25 ივლისს Madonna-ს რემიქს-ალბომი გამოვიდა, რომელიც 1998 წლის ალბომ Ray of Light-იდან აქამდე გამოუქვეყნებელ რელიზებს მოიცავს.
პროექტში მონაწილეობენ Ray of Light-ის თანაავტორი უილიამ ორბიტი და კლუბური სცენის ვარსკვლავები პიტერ რაუჰოფერი, საშა, BT და ვიქტორ კალდერონე. რემიქს-ალბომი სახელწოდებით Veronica Electronica აქამდე გამოუქვეყნებელ ორიგინალურ დემო-ვერსიებსაც მოიცავს, მაგალითად სიმღერა Gone, Gone, Gone, რომელიც პოპვარსკვლავმა რიკ ნოუილთან ერთად შექმნა.
პროექტში ასევე შედის ტრეკები: Drowned World/Substitute For Love, Ray Of Light, Skin, Nothing Really Matters, Sky Fits Heaven, Frozen და The Power Of Good-Bye.
1998 წლის თებერვალში გამოცემული ლეგენდარული ალბომი Ray of Light Billboard 200-ის ჩარტში 78 კვირის განმავლობაში იმყოფებოდა და მეორე ადგილამდე ავიდა, პირველ პოზიციას იმ პერიოდში Titanic-ის საუნდტრეკი იკავებდა. ალბომში შესული ოთხი ჰიტი კი Hot 100-შია შესული, ესენია: Ray of Light, Frozen, The Power of Goodbye და Nothing Really Matters. 1999 წელს ალბომმა გრემის ოთხი ჯილდო მოიპოვა, მათ შორის საუკეთესო პოპ-ალბომის ნომინაციაში.
ალბომმა Ray of Light უმნიშვნელოვანესი როლი შეასრულა ელექტრონული მუსიკის მასშტაბურ პოპულარიზაციაში. Madonna პირველ უდიდეს პოპშემსრულებელად იქცა, რომელმაც სრულად ელექტრონული ალბომი გამოსცა, ამან კი 90-იანი წლების კლუბური კულტურა პოპკულტურაშიც გადმოიტანა.
თავდაპირველად ალბომი Veronica Electronica სრულად Ray of Light-ის რემიქს პროექტი უნდა ყოფილიყო, თუმცა უდიდესი წარმატების გამო მისი გამოცემა გადაიდო. საბოლოოდ, ალბომის 16 მილიონზე მეტი ეგზემპლარი გაყიდა. 27 წლის შემდეგ კი პროექტი შედგა და ალბომი Veronica Electronica გამოიცა.
მოისმინეთ Veronica Electronica:
