ბიონსე უკვე ოფიციალურად Primetime Emmy-ს ჯილდოს მფლობელია. სატელევიზიო აკადემიამ 77-ე დაჯილდოების ჟიურის კატეგორიების გამარჯვებულები გამოავლინა – ანიმაციის, კოსტიუმის, მედიაპროგრამირებისა და მოძრავი გრაფიკის ნომინაციებში.
ბიონსე კოსტიუმის დიზაინის გამარჯვებული გახდა „ნეტფლიქსის” ფილმისთვის Beyoncé Bowl. პოპვარსკვლავმა გამარჯვება გაიზიარა ახალგაზრდა დიზაინერ შიონა ტურინისთან, დამხმარე დიზაინერებთან, ერიკა რაისა და მოლი პიტერსთან, ასევე კოსტიუმების ზედამხედველ ჩელსი სტებელსა და სახელოსნოს ხელმძღვანელ ტიმოთი უაითთან ერთად.
ჟიურის მიერ გამოვლენილი გამარჯვებულები დაჯილდოვდებიან Emmy-ს 77-ე ცერემონიაზე, რომელიც ლოს-ანჯელესში ორი ღამის განმავლობაში, 6 და 7 სექტემბერს გაიმართება. დამონტაჟებული მასალა ეთერით 13 სექტემბერს გადაიცემა.
ჟიურის კატეგორიებში წარდგენილ ნამუშევრებს პროფესიონალთა ჯგუფები განიხილავენ. გამარჯვებულად შეიძლება დასახელდეს ერთი, რამდენიმე ან არც ერთი კანდიდატი. კატეგორიებში არ არიან ნომინანტები. ნაცვლად, არის ერთსაფეხურიანი ხმის მიცემის პროცედურა, რაც მოიცავს ღია დისკუსიებს თითოეული კანდიდატის ნამუშევარზე და სრულყოფილ განხილვას, იმსახურებს თუ არა ის Emmy-ს ჯილდოს.
ბიონსე ასევე წარდგენილია კიდევ ორ სხვა კატეგორიაში Beyoncé Bowl-ისთვის – საუკეთესო მრავალფეროვანი ლაივი (როგორც შემსრულებელი/აღმასრულებელი პროდიუსერი) და საუკეთესო რეჟისურა მრავალფეროვანი შოუსთვის (ალექს რუძინსკისთან ერთად).
ბიონსე ისტორიაში ყველაზე მეტი, 35 გრემის მფლობელია. 2022 წელს მას მიღებული აქვს ოსკარის ნომინაციაც საუკეთესო ორიგინალური სიმღერისთვის, როგორც Be Alive-ის თანაავტორი.
