26 წლის რეჟისორი ნიკო ბალიესტეროსი დაახლოებით 2019 წლიდან აკვირდება და იღებს კანიე უესტს (ამჟამინდელი სახელით – Ye). რეჟისორმა გააერთიანა ბოლო ექვსი წლის განმავლობაში გადაღებული მასალა და აქცია დოკუმენტურ ფილმად, სახელწოდებით – In Whose Name?
სკანდალური არტისტის შესახებ გადაღებული დოკუმენტური ფილმის თიზერი 13 აგვისტოს გამოვიდა. ფილმი AMSI Entertainment-ის პროდუქციაა და კინოთეატრებში მისი პრემიერა 19 სექტემბერს იგეგმება. გამოცემა Deadline-ის ცნობით, ნამუშევარი დაახლოებით 1000 ამერიკულ კინოთეატრში გავა.
ფილმი მაყურებელს კულისებს მიღმა უშვებს, სადაც ჩანს არტისტის კრიზისული პერიოდები და გამარჯვებები, ასევე ის შემოქმედებითი გამოწვევები, რომლებმაც უესტი მე-20 საუკუნის ერთ-ერთ ყველაზე ხმაურიან სახელოვნებო ფიგურად აქცია.
ერთწუთიან თიზერში ხშირად ჩნდება კიმ კარდაშიანი. ამ სცენებში ძირითადად ნაჩვენებია, როგორ კრიზისს გადიოდა მათი ქორწინება. კარდაშიანმა განქორწინების თხოვნით სასამართლოს 2021 წელს მიმართა, ხოლო პროცესი 2022 წლის ნოემბერში დასრულდა.
„შენი პიროვნება რამდენიმე წლის წინ ასეთი არ იყო,“ – ეუბნება კიმი Ye-ს ერთ-ერთ სცენაში მას შემდეგ, რაც ის აღიარებს, რომ უკვე ხუთი თვეა, მედიკამენტებს არ იღებს. უესტი კი ამაზე პასუხობს: „მირჩევნია მოვკვდე, ვიდრე წამლებზე ვიყო დამოკიდებული. ან ისინი გამანადგურებენ, ან მე გავანადგურებ მათ.“
ბალიესტეროსის მიერ გადაღებული დოკუმენტური ფილმის შესახებ ხმები აქამდეც ვრცელდებოდა, მაგრამ ოფიციალურად მისი არსებობა აგვისტოს დასაწყისში დადასტურდა. როგორც ჩანს, მასალა მოიცავს დაახლოებით 2019-დან 2024 წლამდე მონაკვეთს. ამ პერიოდში უესტმა გამოუშვა ისეთი ალბომები, როგორებიც არის Jesus Is King, Donda, Donda 2, Vultures და Vultures 2.
ჯერ უცნობია, როგორ იქნება ფილმში ასახული Ye-ს ირგვლივ განვითარებული სკანდალები, რომლებიც არტისტის მიერ გამოვლენილ სიძულვილის ენას უკავშირდება. ასეთმა შემთხვევებმა განაპირობა უესტის თანამშრომლობის დასრულება ისეთ ბრენდებთან, როგორებიც არის Gap, Balenciaga და Adidas. სწორედ ამ სკანდალების სერია გახდა Ye-ს მისამართით მწვავე საზოგადოებრივი კრიტიკის მიზეზიც.
„ფილმი წარმოადგენს დაუმუშავებელ და ხშირად უხეშ პორტრეტს, კომენტარისა და დასკვნის გარეშე, რაც მაყურებელს თავად უტოვებს მოვლენების ინტერპრეტაციის თავისუფლებას. ნიკო Ye-ს გვერდით ცხოვრობდა, კამერა მუდამ ხელში ეჭირა და ბოლომდე არც იცოდა, რას იღებდა ან სად მიიყვანდა ეს პროცესი. სწორედ ეს ხდის მასალას უნიკალურს,” – განაცხადა AMSI Entertainment-ის დამფუძნებელმა სიმრან სინგჰმა Deadline-თან ინტერვიუში.
ნახეთ დოკუმენტური ფილმის თიზერი:
