Cardi B-ის მეორე ალბომის გამოსვლამდე ერთ თვეზე ცოტა მეტი რჩება. რეპერმა სინგლის – Outside-ის შემდეგ ახალი ტრეკი – Imaginary Playerz გამოუშვა, რომელიც სტრიმინგ პლატფორმებზე 15 აგვისტოს გამოქვეყნდა.
კომპოზიციაში Jay-Z-ის ამავე სახელწოდების ცნობილი ტრეკის სემპლია გამოყენებული. Jay-Z-ის Imaginary Players შესულია 1997 წლის ალბომში, სახელწოდებით In My Lifetime, Vol. 1.
კვირის დასაწყისში Cardi B-მ გაამხილა, რომ სემპლის გამოყენების თანხმობა თავად Jay-Z-ისგან მიიღო. „თუ ის არ დამთანხმდებოდა, ალბათ, რეაქცია არც მექნებოდა. უბრალოდ ვიფიქრებდი, რომ უფრო მეტად უნდა მეცადა, მაგრამ მიხარია, რომ მაქსიმალურად დავიხარჯე და მას მოეწონა,” – თქვა Cardi-მ.
Cardi B-მ ახალი სინგლი ოფიციალურად 11 აგვისტოს დააანონსა და ამასთან ერთად გაავრცელა ტრეკის გარეკანიც, სადაც მას თეთრი ბეწვის ქურქი აცვია. ჯერ უცნობია, სრული ალბომის გამოცემამდე კიდევ გამოუშვებს თუ არა რეპერი ახალ სინგლს.
Cardi-ს მეორე ალბომში სულ 23 ტრეკი იქნება, მათ შორის უკვე ცნობილი Up და WAP. გრემის მფლობელმა რეპერმა აღნიშნა, რომ ამ ძველ ჰიტებს ალბომში განზრახ ტოვებს: „ეს იქნება პირველი და ერთადერთი შემთხვევა, როცა ამაზე ვსაუბრობ,“ – დაწერა არტისტმა ივნისში X-ზე. „WAP და Up ჩემი ორი ყველაზე დიდი სიმღერაა და ფანები მთხოვდნენ, რომ ალბომში შემეტანა. ისინი იმსახურებენ საკუთარ ადგილს.“
მოუსმინეთ Imaginary Playerz-ს:
