პროექტი „ქართული მუსიკალური მემკვიდრეობა” საიუბილეო, მე-10 გამოცემას წარადგენს, რომელიც 2000-იანი წლების ერთ-ერთ ყველაზე ცნობილ კოლექტივს, Kung Fu Junkie-ს მიეძღვნება. კრებული ალბომი, სახელწოდებით – Dance or Die: Undersky Gnostic Pop – ორმაგ ფირფიტაზე 4 სექტემბერს გამოვა.
Kung Fu Junkie 2007-2016 წლებში არსებობდა. მისი ჟღერადობა მუსიკალური ექსპერიმენტებით ხასიათდებოდა და მნიშვნელოვანი როლი ითამაშა თანამედროვე ქართული მუსიკალური სივრცის ჩამოყალიბებაში. როგორც „ქართული მუსიკალური მემკვიდრეობის” გუნდი აფასებს, ეს პროექტი მნიშვნელოვან კულტურულ ფენომენად იქცა.
„სხვადასხვა მუსიკალური ჯგუფის წევრების მიერ დაარსებული კოლექტივი კულტურულად საზრდოობდა თბილისის 2000-იანი წლების პანკ-სცენისგან, ალტერნატიული მუსიკისგან, ფსიქოდელიური გამოცდილებებისა და ინდუსტრიული მუსიკის ფილოსოფიისგან.
თავდაპირველად ჩაფიქრებული, როგორც პერფორმანს-პროექტი, Kung Fu Junkie აერთიანებდა ანდერგრაუნდ თეატრს, რეტრო-ფუტურისტულ კოსმოსურ (როგორც შინაგან, ისე გარეგან) ძიებებს, არაკომერციულ გართობასა და ცეკვას.
მათი ჩანაწერების უმეტესობა იქმნებოდა და იწერებოდა გრინჩის ოთახში, სახელად „Undersky“ , რაც იყო სიტყვა-ცნებათა თამაში: “We’re not underground – we’re Undersky!”,” – ვკითხულობთ პოსტის აღწერაში.
Kung Fu Junkie-მ ახალი ჩანაწერების გამოცემა და მუსიკალური პერფორმანსები 2016 წელს დაასრულა, როცა ჯგუფის კომპოზიტორი, თანადამფუძნებელი და წევრი გრინჩი გარდაიცვალა.
Kung Fu Junkie-ს ფირფიტის პრეზენტაცია Mutant Radio-ს სივრცეში შედგება. ღონისძიებაზე ქართველი არტისტები ისაუბრებენ კოლექტივის შემოქმედებაზე. ასევე, მსმენელებს შესაძლებლობა ექნებათ, შეიძინონ Kung Fu Junkie-ს ფირფიტა.
