გასულ კვირას ფლორენს უელჩის ვიდეომ, სადაც ის მიწის თხრილში ყვიროდა, ფანების აღტაცება გამოიწვია. ვიდეოში Florence + the Machine-ის მთავარი გმირი გავეშებული თხრის მიწას, რის შემდეგაც ორმოში სისხლის გამყინავად ღრიალებს.
ახლა კი ყველაფერი ცხადი გახდა. 19 აგვისტოს უელჩმა Florence + the Machine-ის მომავალი ალბომი დააანონსა, სახელწოდებით Everybody Scream, რომელიც ზუსტად ჰელოუინის დღეს, 31 ოქტომბერს გამოვა.
ამ ეტაპზე Machine-ის რიგით მეექვსე სტუდიური ალბომის შესახებ ბევრი დეტალი ცნობილი არ არის. წინასწარი შეკვეთები უკვე დაიწყო. ვებგვერდის ინფორმაციით, ალბომი 12 სიმღერას მოიცავს. სიმღერების სია და მთავარი სინგლი ჯერ არ გამოქვეყნებულა.
Florence + the Machine-მა ბოლო ალბომი Dance Fever 2022 წელს გამოსცა. ჩანაწერმა მე-7 ადგილი დაიკავა Billboard 200-ში და პირველ ადგილზე გავიდა დიდი ბრიტანეთის ალბომების ჩარტში.
ფანები უელჩისგან ახალ პროექტს უკვე დიდი ხანია, ელიან. 2024 წელს ის გამოჩნდა ტეილორ სვიფტის სიმღერაში Florida!!!, რეკორდული ალბომიდან The Tortured Poets Department. 2025 წლის დასაწყისში კი მონაწილეობა მიიღო The Weeknd-ის Reflections Laughing-ში, ალბომიდან Hurry Up Tomorrow.
ბოლო კვირების განმავლობაში ფანებმა შენიშნეს ცვლილებები უელჩის ვებგვერდსა და სპოტიფაის ანგარიშზე. პარასკევს გავრცელდა კიდევ ერთი ვიდეოთიზერი, რომელშიც უელჩი მინდორზე ხასხასა წითელი ფეხსაცმლითა და შესაბამისი კაბით სეირნობს.
2024 წლის ოქტომბერში Florence + The Machine-მა ლონდონის „როიალ ალბერტ ჰოლში” გამოსვლის ლაივ ალბომი გამოსცა. კონცერტზე, რომელიც BBC Proms-ის ფარგლებში გაიმართა, ჯგუფმა თავისი სადებიუტო ალბომის, Lungs-ის განახლებული ვერსია ჯულს ბაკლის ორკესტრთან ერთად შეასრულა.
