თეთრმა სახლმა საკმაოდ სერიოზულად მიიღო ჯეკ უაითის კრიტიკა, რომელიც დონალდ ტრამპის რეზიდენციის ინტერიერს ეხებოდა და პასუხად მუსიკოსს „უიღბლო” უწოდა.
Daily Beast-თან გაკეთებულ კომენტარში თეთრი სახლის კომუნიკაციების ხელმძღვანელი სტივენ შენგი საპასუხოდ დაესხა თავს როკვარსკვლავს, რომელმაც პრეზიდენტის ოფიციალური სახლის ინტერიერს „ვულგარული, ოქროთი მოჭედილი და უგემოვნო” უწოდა. „ხელმოცარული უიღბლოა, რომელიც სოციალურ მედიაში სისულელეებს პოსტავს იმის გამო, რომ ბევრი დრო აქვს, რადგან მისი კარიერა დასრულებულია.”
„ცხადია, რომ ის არტისტად ინიღბება, რადგან ვერ აფასებს – და გულწრფელად რომ ვთქვათ, უპატივცემულობას გამოხატავს – ოვალური ოფისის მნიშვნელობასა და დიდებულებას, რომელიც ადამიანებს ეკუთვნით.”
თეთრი სახლის კომენტარი მოჰყვა მუსიკოსის პოსტს ინსტაგრამზე, სადაც უაითმა გააზიარა ფოტო ოვალურ ოფისში ტრამპისა და ზელენსკის შეხვედრიდან და დაწერა: „შეხედეთ, როგორ საზიზღრობად გადააქცია ტრამპმა ისტორიული თეთრი სახლი. შეხედეთ მის საშინელ გემოვნებას. ამ თაღლითისგან მეორად მანქანასაც კი არ იყიდდა ვინმე, რომ აღარაფერი ვთქვათ მისთვის ბირთვული კოდების გადაცემაზე. რამხელა სირცხვლია ამერიკის ისტორიისთვის.” მათ შორის, ვინც მუსიკოსის პოსტი მოიწონა, არიან ოლივია როდრიგო და მარენ მორისი.
როგორც ჩანს, უაითს საკითხი ამით არ დაუსრულებია. თეთრი სახლის კომენტარის შემდეგ 12 გრემის მფლობელმა მუსიკოსმა კიდევ ერთი პოსტი დაწერა, სადაც ჩენგს „პროფესიონალი მატყუარა” უწოდა.
„რამდენად უსუსური, პათეტიკური და სქელკანიანი შეიძლება, რომ ეს ადმინისტრაცია გახდეს? ნამდვილ არტისტად ვინიღბები? ტრამპი საერთოდ ადამიანად ინიღბება. ის ქრისტიანად ინიღბება, ლიდერად, ადამიანად ვითომ რეალური ემპათიით. ეს კაცი საფრთხეა არა მხლოდ ამერიკისთვის, არამედ მთელი მსოფლიოსთვის და ეს არ არის გადაჭარბებული. ის ანადგურებს დემოკრატიას და ყოველდღიურად საფრთხეში აგდებს პლანეტას.”
უაითი არასდროს ერიდებოდა საკუთარი აზრის გამოხატვას ტრამპის შესახებ. 2024 წელს, არჩევნების მოგების შემდეგ მას „აშკარა ფაშისტი” უწოდა.
