როგორც ჩანს, კრის მარტინი Coldplay-ს kiss cam-ს აღარ რისკავს. მომღერალმა ლონდონის უემბლის სტადიონზე ერთდროულად შუამავლისა და უსაფრთხოების მცველის როლი შეითავსა და ცოტაოდენი იუმორით ფანს რჩეულისთვის ხელის თხოვნაში დაეხმარა.
რომანტიკული მომენტის დადგომამდე ჯგუფის სოლისტმა კონცერტი გააჩერა და მხიარული „საბაზისო უსაფრთხოების შემოწმება” ჩაატარა, რათა დარწმუნებულიყო, რომ საღამოზე სიურპრიზები არ იქნებოდა, წინა უსიამოვნო გამოცდილებიდან გამომდინარე.
ფანის მიერ გადაღებულ ვიდეოში ჩანს, რომ კონცერტის მსვლელობისას მარტინმა შეამჩნია ფანი, რომელსაც ეჭირა ბანერი წარწერით „მინდა, ხელი ვთხოვო.” ისარი კი მის წინ მდგომ ქალზე მიუთითებდა. მარტინმა კი ამ საქმეში ჩარევა გადაწყვიტა.
„კარგი, ახლა მომისმინეთ. ძმაო, თავი უნდა დამიქნიო გარკვეულ საბაზისო უსაფრთხოების შემოწმებაზე, კარგი? – უთხრა მარტინმა მამაკაცს. „ეს ადამიანი შენი პარტნიორია? კი? და სხვა არავისი?” მას შემდეგ, რაც კაცმა თავი დაუქნია, მომღერალმა განაგრძო: „ბიძაშვილები ან დედმამიშვილები ხომ არ ხართ? ან რაიმე უცნაური? ხელოვნური ინტელექტი ხომ არ ხართ? ნამდვილი ადამიანები ხართ? კარგი, მაშინ ვფიქრობ, რომ შეგვიძლია განვაგრძოთ.”
ამის შემდეგ მარტინმა ექსპრომტად წაუმღერა: „ჩემო მშვენიერო ძმაო, უფასო რჩევას მოგცემ. როცა ყველანი გიყურებთ, თუ როგორ ეშვები, გირჩევ, რომ მუხლზე დაეშვა.”
აუდიტორიის შეძახილების თანხლებით მამაკაცმა მუხლი მოიყარა და რჩეულს ხელი სთხოვა. ქალი დათანხმდა და წყვილმა ერთმანეთს აკოცა. „გილოცავთ, ძმაო და დაო. რა მშვენიერი გოგონაა. რა მშვენიერი ბიჭია. იმედი მაქვს, ცხოვრების ბოლომდე ბედნიერები იქნებით.”
@manoolfd 🥹 #coldplay #ColdplayWembley #musicofthespheres #wembley #proposal ♬ original sound – manny
შემთხვევა ივლისის ინციდენტს მოსდევს, როცა ბოსტონის კონცერტზე კამერამ „ასტრონომერის” აღმასრულებელი დირექტორი ენდი ბაირონი კომპანიის ადამიანური რესურსების ხელმძღვანელ კრისტინ კაბოსთან ერთად დააფიქსირა. ორივე მათგანი ქორწინებაში იმყოფებოდნენ. ინციდენტს ბაირონის გადადგომა მოჰყვა. ბედის ირონიით კი „ასტრონომერმა” პიარის სტრატეგიის ფარგლებში დროებით სპიკერად კრის მარტინის ყოფილი მეუღლე გვინეთ პელტროუ აიყვანა, რათა ინციდენტით გამოწვეული კრიზისი და უარყოფითი რეაქციები შეემცირებინა.
