ტრევის კელსი და პატრიკ მაჰოუმსი რესტორანს ხსნიან, სახელწოდებით 1587 Prime. მენიუში ტეილორ სვიფტით შთაგონებული კოქტეილიც იქნება, რომელსაც მომღერლის ერთ-ერთი სიმღერის, The Alchemy-ს სახელით წარადგენენ.
28 აგვისტოს რესტორნის ინსტაგრამ გვერდზე ვიდეო გამოქვეყნდა, სადაც Kansas City Chiefs-ის წევრები ტრევის კელსი და პატრიკ მაჰოუმსი ერთ-ერთ სასმელს აგემოვნებენ. კოქტეილი რესტორან 1587 Prime-ში მისი ოფიციალურად გახსნის შემდეგ, 17 სექტემბრიდან იქნება ხელმისაწვდომი.
The Alchemy ტეილორ სვიფტის ერთ-ერთი სიმღერის სახელია 2024 წლის ალბომიდან The Tortured Poets Department. გულშემატკივრები დიდი ხანია, თვლიან, რომ მომღერალმა ეს სასიყვარულო სიმღერა სწორედ ტრევის კელსის დაუწერა.
სასმელის წარდგენა ერთ-ერთია იმ სიახლეებიდან, რომლებსაც კელსი და მაჰოუმსი თავიანთი ახალი ბიზნესის გახსნამდე სოციალურ ქსელში ავრცელებენ.
რესტორნის ვებ-გვერდის აღწერაში წერია: „თანამედროვე სტეიკჰაუსი NFL-ის ლეგენდების, პატრიკ მაჰოუმსისა და ტრევის კელსისგან. Noble 33-თან პარტნიორობით შექმნილი და კანზას სიტის სულით შთაგონებული.“
გახსნამდე ცოტა ხნით ადრე, ხუთშაბათს, ტრევის კელსი და პატრიკ მაჰოუმსი Cincinnati Bearcats-ისა და Nebraska Cornhuskers-ის თამაშს დაესწრნენ. მათთან ერთად იმყოფებოდა ტეილორ სვიფტიც, რომელმაც პირველად გამოაჩინა ბრილიანტის ახალი ბეჭედი, მას შემდეგ, რაც წყვილმა 26 აგვისტოს, ნიშნობა დააანონსა.
