ოცი წლის წინ, 2005 წლის 29 აგვისტოს, რიანამ თავისი სადებიუტო ალბომი Music of the Sun გამოსცა. იმ დროს ვერავინ იფიქრებდა, რომ ბარბადოსელი 17 წლის გოგონა მსოფლიოს უდიდესი ვარსკვლავი გახდებოდა.
ორი ათწლეულის შემდეგ რობინ ფენტი (რიანას ნამდვილი სახელი) უკვე ბევრად მეტია, ვიდრე უბრალოდ პოპვარსკვლავი. მისი კარიერა მრავალი მიმართულებით განვითარდა: მსახიობობა (Ocean’s 8,Battleship, Smurfs), ბიზნესი (Fenty Beauty, Savage x Fenty). რიანას დღეს A$AP Rocky-სგან უკვე ორი ვაჟი – RZA და Riot Rose ჰყავს და მესამე შვილზეა ორსულად.
29 აგვისტოს რიანამ სოციალურ ქსელში თავისი ხანგრძლივი კარიერული მიღწევები აღნიშნა. მან გამოაქვეყნა ვიდეო, სადაც წლების განმავლობაში მიღებული ჯილდოები, Billboard-ის ჩარტების ტოპ-ჰიტები, ბიზნეს-წარმატებები და ფილანტროპული საქმიანობაა გაერთიანებული. ვიდეოს თან ახლდა მადლიერების გზავნილი ყველას მიმართ, ვინც მისი ოცნებების რეალობად ქცევაში შეიტანა წვლილი.
„20 წლის წინ დავტოვე ჩემი ქვეყანა, კულტურა, კულინარია, ოჯახი, რათა დამეწყო მოგზაურობა, რომელიც ჩემი პირველი მუსიკალური ნამუშევრის გამოშვებით დაიწყო!“ – დაწერა რიანამ Instagram-სა და X-ზე. „ასობით თქვენგანი ჩემი ცხოვრების და კარიერის ნაწილი იყავით თავიდანვე, ზოგი კი გზად, შემომიერთდით. სამუდამოდ მადლიერი ვარ თითოეული თქვენგანის. ყველამ ძალიან მნიშვნელოვანი როლი ითამაშეთ იმაში, რომ ამ მოგზაურობამ დღეს აქამდე მომიყვანა! მინდოდა, ეს მომენტი გამომეყენებინა, რათა მხოლოდ ერთი სიტყვა მეთქვა: გმადლობთ! გმადლობთ საუკეთესო პირველი 20 წლისათვის! ეს იყო 20 წელი ყველაზე ერთგული, შეუპოვარი ფანებით, რომლებიც მუდამ ჩემს გვერდით დგანან; ეს იყო 20 წელი მძიმე შრომით და ჩემ გარშემო მძიმე შრომის მოყვარული გუნდებით; 20 წელი გაკვეთილებით; 20 წელი დაუვიწყარი გამოცდილებებით და მიღწევებით; ამ 20 წლის მანძილზე ჩემი ოჯახი იყო ჩემი მთავარი საყრდენი; მადლობა იმ ადამიანებს, ვინც მითხრა „კი” და შანსი მომცა ჯერ კიდევ იქამდე, სანამ ეს ყველაფერი “მაგარი” გახდებოდა (მადლობა პროდიუსერებს, დიჯეებს, ავტორებს, ქორეოგრაფებს, რეჟისორებს, დიზაინერებს, ფოტოგრაფებს, გრიმის სპეციალისტებს, ჟურნალისტებს, ბრენდებს, მენტორებს და ასე შემდეგ.) მადლობა ამ 20 წლისთვის! მადლობა ღმერთს, ძალიან გულუხვი იყო ჩემ მიმართ, დიდება მას!” – წერს რიანა.
ვარსკვლავმა გზავნილი დაასრულა ჰეშთეგით #R20 – ზუსტად ისე, როგორც მისი ერთგული ფანები მთელი დღის განმავლობაში წერდნენ სოციალურ ქსელში.
ყველაფერი Music of the Sun-ით დაიწყო, რომლის წამყვანი სინგლი Pon De Replay 2005 წლის ივლისში, სრული ალბომის გამოცემამდე ერთი თვით ადრე გამოვიდა და Billboard Hot 100-ის ჩარტში მე-2 ადგილზე გავიდა. დღემდე რიანას 32 ჰიტი მოხვდა Hot 100-ის ტოპ-10-ში, მათგან 14-მა კი 1-ელი პოზიცია დაიკავა. Music of the Sun გამოშვებისთანავე მოხვდა Billboard 200-ის მე-10 ადგილზე და ჩარტში 35 კვირა დაჰყო.
იხილეთ რიანას სრული პოსტი, რომელიც მან მუსიკალურ ინდუსტრიაში 20 წლის აღსანიშნავად გამოაქვეყნა:
20 years ago, i left my country, my culture, my food, and family to embark on a journey that started with the release of my very first body of music! So many of you were a part of my life and career since the very beginning, and some of you have joined the adventure along the… pic.twitter.com/aXdcAlo1St
— Rihanna (@rihanna) August 29, 2025
