31 აგვისტოს Spotify-მ ინსტაგრამზე განაცხადა, რომ 2020 წლის მეგაჰიტი – The Weeknd-ის Blinding Lights პლატფორმის ისტორიაში ოფიციალურად გახდა პირველი სიმღერა, რომელმაც ხუთი მილიარდი ე.წ. სტრიმი დაიმსახურა. მალევე, The Weeknd-მა თავის 78 მილიონ გამომწერს ეს ამბავი ინსტაგრამის Story-ში გაუზიარა.
სიმღერამ Spotify-ს ახლი რეკორდი სხვა უახლესი მიღწევის პარალელურად დაამყარა. რამდენიმე დღით ადრე Blinding Lights-მა პირველი ადგილი დაიკავა Billboard-ის 21-ე საუკუნის R&B/Hip-Hop სიმღერების ჩარტში. ეს შედეგი ეყრდნობა R&B/Hip-Hop სიმღერების ჩარტის ყოველკვირეულ შედეგებს 2000 წლის დასაწყისიდან 2024 წლის ბოლომდე.
სიმღერა 2019 წლის ნოემბერში გამოვიდა, როგორც The Weeknd-ის მეოთხე სტუდიური ალბომის – After Hours-ის მეორე სინგლი. Blinding Lights ოთხი კვირის განმავლობაში ლიდერობდა Billboard Hot 100-ის ჩარტში და გახდა პირველი სიმღერა, რომელიც ერთი წელი ინარჩუნებდა ადგილს წამყვან ათეულში. 2021 წლის ნოემბერში სინგლი ისტორიაში ჩაიწერა, როდესაც Chubby Checker-ის The Twist-ს გადაუსწრო და პირველი ადგილი დაიკავა Billboard-ის ჩარტში, სახელწოდებით – Greatest of All Time Hot 100.
2024 წლის იანვარში Blinding Lights აბელ ტესფაიეს (The Weeknd) პირველი სიმღერა გახდა, რომელმაც Spotify-ზე ოთხ მილიარდ სტრიმინგს გადააჭარბა.
„მუდამ გამაოცებს ის ფაქტი, რომ ჩემი შექმნილი რაღაც მილიონობით ადამიანს მოსწონს. მით უმეტეს, მილიარდობით ადამიანს!” – აღნიშნა The Weeknd-მა სპეციალურ განცხადებაში. „უზომოდ მადლობელი ვარ, რომ ეს სიმღერა ისეთ ემოციას გასცემს, რომ კვლავ და კვლავ უსმენენ მას.”
Blinding Lights არის The Weeknd-ის 28 სიმღერიდან ერთ-ერთი, რომელიც Spotify-ის Billions Club-ში შედის. ამ მხრივ, The Weeknd სტრიმინგ პლატფორმის რეკორდსმენია, რადგან სხვა არცერთი არტისტი არ შესულა სიაში ამდენი სიმღერით. მუსიკოსმა 2024 წლის დეკემბერში Spotify-ის პირველ Billions Club: Live კონცერტზეც იმღერა.
იხილეთ Spotify-ს ინსტაგრამზე გამოქვეყნებული პოსტი Blinding Lights-ის შესახებ:
