მანანა მენაბდე 76 წლის ასაკში გარდაიცვალა. ინფორმაცია ხელოვანის მეგობრებმა და ოჯახის ახლობლებმა სოციალურ ქსელში გაავრცელეს.
მანანა მენაბდე 1948 წელს დები იშხნელების ოჯახში დაიბადა. კარიერა ორკესტრ „რეროსთან“ დაიწყო, შემდგომში მოსკოვში გაემგზავრა და თეატრალური ხელოვნების აკადემიაში სწავლობდა.
მისი სიმღერები პირველად გაჟღერდა ლანა ღოღობერიძის 1982 წლის ფილმში „დღეს ღამე უთენებია“, სადაც მანანა მენაბდე თავად ასრულებდა ერთ-ერთ მთავარ როლს. აღსანიშნავია, რომ ფილმმა კანის კინოფესტივალზე მაყურებლის პრიზი დაიმსახურა.
მენაბდის შემოქმედებაში ცენტრალური ადგილი დაიკავა ქართულ ფოლკლორულ საწყისებზე აგებულმა, მაგრამ ამავდროულად თანამედროვე ინტერპრეტაციამ. 1980-90-იან წლებში მუსიკოსი აქტიურად თანამშრომლობდა ქართულ ფოლკ-ჯაზ ჯგუფთან „შინ”. მან ასევე ჩაწერა ალბომი, სახელწოდებით „Sami“ ნიკა მაჩაიძესთან და გოგი ძოძუაშვილთან ერთად.
2023 წელს Billboard Georgia-მ მანანა მენაბდესთან ვრცელი ინტერვიუ ჩაწერა, რომელშიც ხელოვანმა თავის ცხოვრებასა და შემოქმედებით ხედვაზე ისაუბრა.
„ამ გადასახედიდან სულ ვამბობ, რომ საერთოდ, თუკი რაიმე ღირებული და საინტერესო გინდა გააკეთო ხელოვნებაში, ურცხვი თვალი გჭირდება. ურცხვ თვალს შეუძლია დაინახოს ის, რასაც ჩვეულებრივი თვალი ვერ ხედავს. თუ შენ არ დაარღვიე რაღაც კანონი, მაშინ წინ ვერ წახვალ. მე იმას არ ვამბობ, რომ შარვალი რომ ჩავიცვი, რაღაც საოცრება გავაკეთე და სამყარო შევცვალე. მაგრამ ჩემში შეიცვალა ხედვა, ჩემში გაფართოვდა ჰორიზონტი. აქ Საქმე შარვალში კი არ არის – გამბედაობაშია. გარდა ამისა, ბევრი სხვა რამ დავინახე. ადამიანები დავინახე: ვინ როგორ უყურებს მოვლენებს, ვინ არის შენთან ერთად, ვინ არ არის, ვის როგორ ესმის შენი ამბოხი – ესეც ხომ საინტერესოა?! ეს ყველაფერი ხომ გროვდება შენში… შენს თავზე მეტი თუ არ გახდი, ვერაფერ ღირებულს ვერ გააკეთებ – გინდ შარვლის ჩაცმა იყოს ეს და გინდ სხვა რამ,” – ამბობდა ის ინტერვიუში.
მანანა მენაბდე სიცოცხლის ბოლო თვეებში მძიმე დაავადებას ებრძოდა.
