DEENA-მ ახალი სიმღერა და მასზე გადაღებული ვიდეოკლიპი გამოსცა. სიმღერა, სახელწოდებით Lil Star, საქართველოში მიმდინარე საპროტესტო აქციების ფონზე შეიქმნა და ქვეყანაში განვითარებულ მოვლენებს ეხმაურება. მისი ავტორები თავად არტისტი და პროდიუსერი ნიკა ფასური არიან.
DEENA:
„როცა მთელი საქართველოს მასშტაბით საპროტესტო აქციები მიმდინარეობდა, ყველა ადამიანის ტვინსა და გულში გაუგებარი აზრები ტრიალებდა მათი დარჩენილი ცხოვრების საქართველოში გატარებასთან დაკავშირებით. მათგან ერთ-ერთი მეც ვიყავი. კარგად მახსოვს, როგორ ერთიანდებოდა უსუსურობის შეგრძნება ბრაზთან, სამშობლოს დაცვისა და გადარჩენის სურვილთან. სწორედ ამ ემოციებზე საუბრობს Lil Star. სიმღერაში ვარსკვლავი სამშობლოს აღნიშნავს, რომლის ხელში აყვანა და დახმარება, გარემოებებიდან გამომდინარე, რთულია, მაგრამ ვერც ტოვებ მას.
ვიდეოკლიპი გადაღებულია სახელმწიფოს ერთ-ერთი მთავარი ინსტიტუციების ფონზე: მთავრობის სახლი, პარლამენტი, „ჯარის ქალაქი”. კლიპში ჩანს გმირთა მოედანიც, რომელიც სამშობლოსთვის მებრძოლი ადამიანების სიმბოლოა. ამ შენობების წინ თვალდახუჭული დგომა შეიძლება სხვადასხვა აზრის მატარებელი იყოს. ჩემთვის ეს მდგომარეობა იმედის, სიმშვიდის, სიამაყისა და მედგრად დგომის გამომხატველია.”
