ლედი გაგა და არიანა გრანდე 2025 წლის MTV Video Music Awards-ის მთავარი გამარჯვებულები არიან. დაჯილდოების ცერემონია 7 სექტემბერს ნიუ-იორკში შედგა. გაგამ ყველაზე მეტი, 4 გამარჯვება მოიპოვა, თუმცა უმაღლესი ჯილდო – წლის ვიდეო – Brighter Days Ahead-ისთვის არიანა გრანდეს ერგო.
ლედი გაგა გახდა მეორე ადამიანი, ვინც წლის არტისტის წოდება ორჯერ მოიგო – პირველი ტეილორ სვიფტია. წლევანდელი დაჯილდოების შემდეგ გაგას ჯილდოების საერთო რაოდენობამ 22 შეადგინა, რაც მას მესამე ადგილას აყენებს სვიფტისა და ბიონსეს შემდეგ, რომლებიც 30-30 გამარჯვებით ლიდერობენ.
ქალები სრულად დომინირებდნენ დაჯილდოების ცერემონიაზე. ჯამში 30 ნომინაციიდან 22-ში სწორედ ქალმა მუსიკოსებმა გაიმარჯვეს. კაც არტისტებს ექვსი გამარჯვება ერგოთ, დანარჩენი ორი კი ქალისა და მამაკაცის კოლაბორაციებს ხვდა წილად (ლედი გაგა და ბრუნო მარსი და ROSÉ და ბრუნო მარსი).
ქალმა არტისტებმა გაიმარჯვეს 10 ჟანრობრივი კატეგორიიდან 8-ში: საბრინა კარპენტერი – საუკეთესო პოპარტისტი, არიანა გრანდე – საუკეთესო პოპი, Doechii – საუკეთესო ჰიპ-ჰოპი, მერაია კერი – საუკეთესო R&B, შაკირა – საუკეთესო ლათინო, LISA ( Doja Cat-სა და RAYE-სთან ერთად) – საუკეთესო K-პოპი, ტაილა – საუკეთესო აფრობიტსი, მეგან მორონი – საუკეთესო ქანთრი. მამაკაცებმა მხოლოდ ორი ჟანრობრივი კატეგორიის მოგება შეძლეს: sombr – საუკეთესო ალტერნატივა და Coldplay – საუკეთესო როკი.
ლედი გაგამ ასევე მოიგო საუკეთესო რეჟისურის ნომინაცია ვიდეოსთვის Abracadabra. ეს მიმდევრობით მეექვსე შემთხვევაა, როცა საკუთარი ვიდეოს რეჟისორობის ან თანარეჟისორობისთვის ამ კატეგორიას თავად არტისტი იგებს. 2020 წლის შემდეგ ტეილორ სვიფტს აღნიშნული ჯილდო ოთხჯერ აქვს მოგებული, როგორც საკუთარი ვიდეოების სოლო რეჟისორს.
ლედი გაგამ და ბრუნო მარსმა მოიგეს საუკეთესო კოლაბორაციის კატეგორია Die With a Smile-სთვის, რაც ამ ნომინაციაში გაგას მესამე გამარჯვებაა.
ისევე, როგორც არიანა გრანდემ, სამი ჯილდო დაიმსახურა საბრინა კარპენტერმაც, მათ შორისაა წლის ალბომი Short n’ Sweet-ისთვის, რომელსაც საუკეთესო პოპ ვოკალური ალბომის კატეგორიაში თებერვალში გრემი გადაეცა.
საღამოს სხვა გამარჯვებულები იყვნენ ბრუნო მარსი, ტეიტ მაკრეი, Doechii და მერაია კერი. თითოეულმა მათგანმა ორ-ორი ჯილდო მოიპოვა. მარსი ერთადერთი მამაკაცი არტისტია, რომელმაც ერთზე მეტი ნომინაცია მოიგო.
წელს MTV-მ ჯილდოები სხვადასხვა არტისტს გაუნაწილა, რაც იმაში გამოიხატა, რომ ოთხზე მეტი ნომინაცია არავის მოუგია. თუმცა, ნომინაციების სიუხვის მიუხედავად, ზოგი არტისტი ჯილდოს გარეშე დარჩა, მათ შორის არიან The Weeknd (7 ნომინაცია), Bad Bunny, ედ შირანი, Jelly Roll, მაილი საირუსი და მორგან უოლენი (თითოეულს 4-4 ნომინაცია).
საუკეთესო ახალი არტისტის წოდება ალექს უორენმა დაიმსახურა, რითაც ამ ნომინაციაში გამარჯვებული პირველი მამაკაცი გახდა 2017 წლის შემდეგ.
საუკეთეო ჯგუფი Blackpink გახდა. ეს უკვე მიმდევრობით მეშვიდე წელია, რაც კატეგორიას K-პოპ ჯგუფი იგებს.
ლისამ მესამედ მოიპოვა საუკეთესო K-პოპ შესრულების ჯილდო, Doja Cat-სა და RAYE-სთან კოლაბორაციით Born Again. მერაი კერი კი საუკეთესო R&B-ის გამარჯვებული გახდა Type Dangerous-ისთვის, რაც მისი პირველი VMA-ს ჯილდოა.
წელს ტეილორ სვიფტი წლის ვიდეოზე ნომინირებული არ ყოფილა. ეს კი იმას ნიშნავს, რომ ეს არის პირველი შემთხვევა, როცა ნომინაცია სვიფტის გარდა სხვამ მოიგო 2021 წლის შემდეგ, როცა გამარჯვება Lil Nas X-ს ხვდა წილად Montero (Call Me by Your Name)-სთვის.
