წინანდლის ფესტივალის დაუვიწყარი მუსიკალური დღეები გრძელდება. 9 სექტემბერს დღის ღონისძიება 12:00 საათზე კამერულ დარბაზში გაიხსნება, სადაც სტუმრების წინაშე მევიოლინე მარკ ბუშკოვი, ჩელისტი ჯინგ ჟაო და პიანისტი ალექსანდრა დოვგანი ერვინ შულჰოფის, ფრედერიკ შოპენისა და სერგეი რახმანინოვის ნაწარმოებებს შეასრულებენ.
ბელგილი მევიოლინე მარკ ბუშკოვი განსაკუთრებული ექსპრესიული შესრულებით გამოირჩევა. აღსანიშნავია, რომ მუსიკოსი მსოფლიოს წამყვან ორკესტრებთან და დირიჟორებთან თანამშრომლობს, მათ შორის ისრაელის ფილარმონიასთან, ბუდაპეშტის ორკესტრთან, მიუნხენის ფილარმონიასთან და სხვა. იგი მონაწილეობს ისეთ პრესტიჟულ ფესტივალებში, როგორებიცაა: ვერბეის ფესტივალი შვეიცარიაში, წინანდლის ფესტივალი საქართველოში და საერთაშორისო კამერული მუსიკის ფესტივალი ისრაელში. მარკ ბუშკოვი დღეს კლასიკური მუსიკის სცენაზე ერთ-ერთ ყველაზე აღიარებულ ახალგაზრდა შემსრულებლად ითვლება.
მუსიკოსი ჯინგ ჟაო მისი ღრმა მუსიკალური და ვირტუოზული შესრულებით კლასიკური მუსიკის სივრცეში ერთ-ერთი ყველაზე აღიარებული ჩელისტია. მისი კარიერა ბერლინის ფილარმონიულ ორკესტრთან წარმატებული დებიუტით დაიწყო. ჯინგ ჟაოს მსოფლიოში ცნობილ დირიჟორებთან და მრავალ პრესტიჟულ ორკესტრთან უთანამშრომლია, მათ შორის: მიუნხენის კამერული ორკესტრი, ბერლინის კონცერტჰაუს ორკესტრი, სიდნეის სიმფონიური ორკესტრი, ნიუ იორკის და ტოკიოს ფილარმონიები. ჯინგ ჟაო ხშირად ასრულებს კამერულ მუსიკას ისეთ ცნობილ არტისტებთან, როგორებიც არიან: მარტა არგერიხი, ბორის ბერეზოვსკი, მიხაელ გუტმანი და მაქსიმ ვენგეროვი.
რაც შეეხება პიანისტ ალექსანდრა დოვგანს, ის ადრეული ასაკიდანვე ვირტუოზ შემსრულებლად ითვლებოდა. 2018 წელს სანქტ-პეტერბურგში მარიინსკის საერთაშორისო საფორტეპიანო ფესტივალი გახსნა; 2019 წელს, 11 წლის ასაკში, მუსიკოსი აუდიტორიის წინაშე ბერლინის ფილარმონიულ ორკესტრთან ერთად წარდგა. შემდგომში კი ჰქონდა გამოსვლები მიუნხენში Prinzregententheater-ში, ამსტერდამში – Concertgebouw-ში, პარიზში – théâtre des Champs-Élysées-ში, ვენის კონცერტჰაუსში, ბერლინში – Pierre-Boulez-Saal-ში, ციურიხის Tonhalle-ში და სხვა ცნობილ საკონცერტო დარბაზებში.
9 სექტემბერს, საღამოს 19:00 საათზე წინანდლის ფესტივალის ამფითეატრის სცენაზე „სუხიშვილები“ მრავალფეროვანი პროგრამით წარდგებიან.
ქართული კულტურის ელჩად წოდებული ნაციონალური ბალეტი „სუხიშვილები“ უდიდესი ისტორიის მატარებელია. ეს არის წარსულის, საუკუნოვანი ტრადიციებისა და თანამედროვეობის უნიკალური სინთეზი, რომელიც სცენაზე თითოეული მოძრაობით ცოცხლდება. მათი განუმეორებელი სტილი, დახვეწილი ტექნიკა და ტრადიციული ელემენტები მსოფლიოს არაერთ ქვეყანაში მნახველს ემოციებითა და შთაბეჭდილებით ავსებს. „სუხიშვილები“ ხაზს უსვამს, რომ ქართული ცეკვა არა მხოლოდ წარსულის მემკვიდრეობა, არამედ ცოცხალი, დინამიური ხელოვნებაა, რომელიც საუკუნეებს სცილდება.
ფესტივალის პროგრამის სანახავად ეწვიეთ ბმულს. ბილეთების შესაძენად კი ეწვიეთ tkt.ge-ს.
