ბრიტანელი მომღერალი და სიმღერების ავტორი ედ შირანი თავის მერვე სტუდიურ ალბომს – Play-ს დღე წარადგენს, რომელშიც სხვა სინგლებთან ერთად შესულია უკვე გამოქვეყნებული სიმღერები – Camera, A Little More, Azizam, Sapphire, Old Phone და სხვა.
ინდური და სპარსული მუსიკალური კულტურებით შთაგონებული ალბომი შირანისთვის ახალი შემოქმედებითი ეტაპის დასაწყისია.
„Play შეიქმნა, როგორც პირდაპირი პასუხი ჩემი ცხოვრების ყველაზე ბნელ პერიოდზე. ამ ყველაფრის შემდეგ მხოლოდ სიხარულისა და ფერადოვნების შექმნა მსურდა, ასევე იმ ქვეყნების კულტურების გამოკვლევა, სადაც ტურებით ვმოგზაურობდი,“ – დაწერა შირანმა 2025 წლის დასაწყისში Instagram-ზე. „ეს ალბომი ემოციებით სავსეა – მოიცავს ყველაფერს, რაც მიყვარს მუსიკაში: სიხარულს, სიამოვნებას, მაგრამ ასევე ჩემს გზას, რომელიც გავიარე, როგორც ადამიანმა, პარტნიორმა და მამამ.“
ახალი ალბომის აღსანიშნავად, შირანმა გამოუშვა ოფიციალური ვიდეოკლიპი, რომელიც გადაღებულია სინგლზე – Camera, სადაც მთავარ როლში ფიბი დინევორია.
Play-ს მეშვეობით მუსიკოსი იმედოვნებს, რომ შეინარჩუნებს თავის სრულყოფილ წარმატებას საკუთარ ქვეყანასა და ავსტრალიაში, სადაც მისი ყველა სტუდიური ალბომი ჩარტების სათავეში მოხვდა, მათ შორის 2023 წლის Autumn Variations.
რაც შეეხება აშშ-ის ჩარტებს, შირანს კარიერის განმავლობაში ორი პირველი ადგილის მფლობელი ჰიტი აქვს Billboard Hot 100-ზე, მათ შორის – Shape Of You, რომელიც სტრიმინგის ისტორიაში ერთ-ერთი ყველაზე ბევრჯერ მოსმენილი სიმღერაა. შირანი ასევე ოთხჯერ ლიდერობდა Billboard 200-ის ჩარტში.
12 სექტემბერს, ალბომის გამოცემის დღეს, შირანი პირველად გამართავს Tiny Desk-ის ფორმატით ლაივს, სადაც ახალ მუსიკას შეასრულებს.
20 სექტემბერს მუსიკოსს დაგეგმილი აქვს გამოსვლა iHeartMusic Festival-ზე, ლას-ვეგასში. დეკემბერში კი სტარტს აიღებს მისი ახალი The Loop Tour, რომელიც ევროპის კონტინენტსა და დიდ ბრიტანეთს მოიცავს. 2026 წლის დასაწყისში მუსიკოსი უკვე ავსტრალიასა და ახალ ზელანდიასაც ესტუმრება.
ოთხგზის გრემის მფლობელმა შირანმა Mathematics-ის ეპოქა ოფიციალურად 7 სექტემბერს დიუსელდორფში საბოლოო კონცერტით დაასრულა. ეს იყო გლობალური ტური, რომელიც 2022 წლის აპრილში დაიწყო და 160-ზე მეტ კონცერტს მოიცავდა.
