მიუხედავად იმისა, რომ დრეიკი და ლებრონ ჯეიმსი წელიწადზე მეტია, აღარ მეგობრობენ, კალათბურთელი მაინც ხაზგასმით აცხადებს, რომ არტისტს დიდ პატივს სცემს.
ლებრონ ჯეიმსმა დრეიკთან ამჟამინდელ ურთიერთობაზე Complex-ის ჟურნალისტ სპიდი მორმონთან ინტერვიუში ისაუბრა. მიუხედავად იმისა, რომ სუპერვარსკვლავებს ახლო ურთიერთობა აღარ აქვთ, ლებრონი მაინც ამტკიცებს, რომ დრეიკის მიმართ მისი სიყვარული უცვლელია.
„ყოველთვის საუკეთესოს ვუსურვებ. ბუნებრივია, ახლა სხვადასხვა ეტაპზე ვართ: ის თავის საქმეს აკეთებს, მე – ჩემსას, მაგრამ სიყვარული არსად გამქრალა,” – თქვა სპორტსმენმა.
ლებრონსა და დრეიკს ახლო მეგობრობა 2009 წლიდან აკავშირებდათ. ამ დროს რეპერი So Far Gone-ის ეპოქას იწყებდა. 2023 წელს დრეიკი ლოს-ანჯელესში გამართული კონცერტისას სცენაზე ლებრონთან და მის შვილთან, ბრონისთან ერთად ავიდა მას შემდეგ, რაც კალათბურთელს ჯანმრთელობის პრობლემები შეექმნა.
თუმცა ყველაფერი შეიცვალა მას შემდეგ, რაც დრეიკი კენდრიკ ლამართან კონფლიქტში ჩაერთო. გასულ ივნისს ლებრონი კენდრიკის კონცერტს დაესწრო, რაც დრეიკმა პირად შეურაცხყოფად მიიღო და ეს უკმაყოფილება რამდენიმე ტრეკშიც გამოხატა. ინტერნეტში არაოფიციალურად გავრცელებულ Fighting Irish Freestyle-ში დრეიკის ადრესატი, როგორც ჩანს, ლებრონ ჯეიმსია. ტექსტში დრეიკმა აღნიშნა, რომ ეს მისთვის უფრო პირადულია, ვიდრე მხოლოდ ბიზნესი. Fighting Irish Freestyle არ იყო ერთადერთი ტრეკი, რომელშიც დრეიკი, სავარაუდოდ, თავის კალათბურთელ მეგობარს გულისხმობდა. იგივე შინაარსობრივი ხაზი გამოიკვეთა ივლისში გავრცელებულ ტრეკშიც – What Did I Miss?.
დრეიკმა ასევე მოიშორა ლებრონ ჯეიმსთან დაკავშირებული ტატუც და ის ახალი სიმბოლოთი დაფარა.
ჯერ კიდევ გასარკვევია, იქნება თუ არა ლებრონი დრეიკის სიმღერების ადრესატი დაანონსებულ ალბომში – Iceman.
ნახეთ ლებრონ ჯეიმსის ინტერვიუ, სადაც ის დრეიკისადმი თავის დამოკიდებულებაზე საუბრობს.
