თბილისის მთავარ საკონცერტო დარბაზს, ფილარმონიის ისტორიულ შენობას, სრული რეაბილიტაცია ჩაუტარდება. ინფორმაციას ამის შესახებ Starring Georgia ავრცელებს, რომელიც თავადვეა პროექტის ორგანიზატორი.
შენობა, რომელიც 60-იან წლებში არქიტექტორ ივანე ჩხენკელის ხელმძღვანელობით აშენდა, მალევე თბილისის ერთ-ერთ სავიზიტო ბარათად და კულტურულ ძეგლად იქცა. თუმცა დღეს, Starring Georgia-ს თქმით, მისი მდგომარეობა საკმაოდ მძიმეა, რის გამოც დღის წესრიგში დადგა შენობის რეაბილიტაციის აუცილებლობა.
რეაბილიტაციის ფარგლებში არ შეიცვლება შენობის სახელი, იდენტობა, დარბაზის არქიტექტურული იერსახე და ფასადები. შენარჩუნდება ინტერიერის ვინტაჟური სახეც, რაც უკვე ნახევარი საუკუნეა, ფილარმონიის სავიზიტო ბარათს წარმოადგენს. პროექტის ფარგლებში მოხდება საინჟინრო და ტექნოლოგიური ინფრასტრუქტურის სრული განახლება თავდაპირველი არქიტექტურული იერსახის მაქსიმალური დაცვით.
რეაბილიტირებულ შენობაში განთავსდება ხმის ჩამწერი სტუდია, სახელოსნო, სკოლა, ექსპერიმენტული სცენა, სოციალური სივრცე და მუზეუმი, რომელიც ახალი თაობისთვის დროის კაფსულის ფუნქციას შეასრულებს. სწორედ მუზეუმში გაცოცხლდება ის ღონისძიებები და ემოციები, რომლებიც 1971 წლიდან დღემდე ამ შენობის და მთლიანად ქალაქისა და ქვეყნის კულტურულ ცხოვრებას ქმნიდა.
მასშტაბური პროექტის ფარგლებში ასევე იგეგმება ფილარმონიის კულტურული მემკვიდრეობის განახლებაც. სწორედ ამ მიზანს ემსახურება „ფილარმონია – დროის კადრები”, რომელიც გულისხმობს შენობაში დაცული საარქივო ფოტო-ვიდეო მასალის გაცოცხლებას, გაციფრულებასა და დაკარგული არქივის მომავალი თაობებისთვის შემონახვას.
ორგანიზატორების თქმით, ისტორიული პროექტის მიზანია, ფილარმონია იქცეს თანამედროვე ხელოვნების ცენტრად, რომელიც ქალაქის კულტურული ცხოვრების რიტმს განსაზღვრავს.
