Fortnite საბოლოოდ გაამხელს, თუ რას გულისხმობს „ყველაზე დიდ მუსიკალურ გამოცდილებაში”, როცა 27 სექტემბერს თამაშში Daft Punk-ის კოლექცია ჩაეშვება.
მუსიკალური ჯგუფისა და ერთ-ერთი ყველაზე პოპულარული თამაშის კოლაბორაცია მოიცავს 31 სიმღერას დუეტის კატალოგიდან, რომლებიც სხვადასხვა ინტერაქტიულ ოთახში იქნება განთავსებული. მომხმარებლებს საშუალება ექნებათ, თავად გამიქსონ სიმღერები, აცეკვონ თავიანთი ავატარები Daft Club-ში, სადაც ნაჩვენები იქნება ბენდის 2007 წლის ტურნეს კადრები. ასევე შეეძლებათ, შექმნან ლეგოს მუსიკალური ვიდეოები ბენდის მონაწილეობით.
Fortnite-ის მაღაზიაში ხელმისაწვდომი იქნება ჯგუფის სავიზიტო ჩაფხუტები, კოსტიუმები და აქსესუარები, ასევე ინსტრუმენტები და კომპოზიცია Get Lucky. Daft Punk-ის დიდი ხნის პარტნიორი Hervet Manufacturier კი შექმნის ავეჯს, რომელიც თამაშში იქნება ინტეგრირებული.
Fortnite-ს მუსიკალური კოლაბორაციები მანამდეც არაერთხელ ჰქონია, მათ შორის ისეთ არტისტებთან, როგორებიცაა ტრევის სკოტი, PARTYNEXTDOOR, ბრუნო მარსი, არიანა გრანდე, ბილი აილიში, სნუპ დოგი, ემინემი და Marshmello. Daft Punk სიას ოფიციალურად შაბათს, 27 სექტემბერს შეუერთდება, როცა The Daft Punk Experience თამაშში ჩაეშვება.
„წლებია, მომხმარებლები თამაშში Daft Punk-ის შემოყვანას გვთხოვენ,” – ამბობს ალექს რიგოპულოსი – Epic Games-ის გეიმ დეველოპმენტის მუსიკალური მიმართულების ხელმძღვანელი. „ის ბოლო 30 წლის ერთ-ერთი ყველაზე უნიკალური და ინოვაციური მუსიკალური დუეტია, ასე რომ, მასთან თანამშრომლობა კიდევ უფრო მაღალ დონეზე უნდა აგვეყვანა. წარსულში გვქონია საოცარი კონცერტები, რომლებიც 10-15 წუთი გრძელდებოდა და სრულდებოდა, ქრებოდა. Daft Punk-ისთვის კი რაღაც უფრო დიდი, ღრმა და ხანგრძლივი ეფექტის მქონე გვინდოდა. რაღაც ისეთი, რის გაკეთებასაც ფანები არა ერთჯერადად, არამედ განმეორებითად შეძლებდნენ.”
