დუა ლიპა ტურნეს, Radical Optimism World Tour-ის ფარგლებში ცნობილ არტისტებთან თანამშრომლობის ტრადიციას კვლავ აგრძელებს.
20 სექტემბერს პოპვარსკვლავმა ნიუ-იორკში, Madison Square Garden-ში, ოთხდღიანი კონცერტების სერიის მესამე შოუ გამართა, სადაც სცენაზე ლეგენდარული მუსიკოსი ნაილ როჯერსი მიიწვია. მუსიკოსებმა ამერიკული ჯგუფის, Chic-ის 1978 წლის კლასიკური დისკო ჰიტი Le Freak შეასრულეს.
ცნობილია, რომ დუა ლიპა Radical Optimism-ის ფარგლებში თითოეულ ქალაქში ადგილობრივი სიმღერების ქავერ ვერსიებს ასრულებს. ტურნეს ამერიკული კონცერტები მიმდინარე თვეს ჩიკაგოში, United Center-ში დაიწყო.
Madison Square Garden-ში გამართულ წინა კონცერტებზე დუა ლიპამ ნიუ-იორკის კლასიკად ქცეული ალიშა კისის სიმღერა No One და Blondie-ს One Way or Another, სწორედ ამ ქალაქის საპატივცემულოდ შეასრულა. „აქ, ნიუ-იორკში, სიმღერების არჩევანში ნამდვილად განებივრებული ვარ.” – აღნიშნა დუა ლიპამ Blondie-ის სიმღერის შესრულებამდე.
აქვე შეგიძლიათ გაეცნოთ Billboard-ის მიმოხილვას, სადაც დუა ლიპას Madison Square Garden-ში გამართული მეორე კონცერტის ხუთი საუკეთესო მომენტია განხილული.
დუა ლიპას Radical Optimism-ის ტურნეს ამერიკული ეტაპი 5 სექტებერს ჩიკაგოში გამართული კონცერტით გაიხსნა, სადაც მუსიკოსმა სცენაზე ქალაქის ლეგენდად წოდებული ფანკის დედოფალი – ჩაკა ხანი მიიწვია. არტისტებმა 1983 წლის ჰიტი Ain’t Nobody შეასრულეს.
ქალაქებისთვის განკუთვნილი სპეციალური ქავერ სიმღერების შესრულების ტრადიცია დუა ლიპამ ჯერ კიდევ ავსტრალიისა და ახალი ზელანდიის კონცერტებზე დაიწყო, სადაც ცნობილი არტისტების – AC/DC-ის, Lorde-ისა და კაილი მინოუგის სიმღერები შეასრულა. კონცერტებზე მას სცენაზე სპეციალურად მოწვეული სტუმრებიც უერთდებოდნენ: ტროი სივანი, Tame Impala და Crowded House-ის ნილ ფინი.
მიუხედავად იმისა, რომ ეს ტრადიცია ევროპულ ტურნეზე არც თუ ისე ხშირი იყო, დუა ლიპამ მადრიდში ენრიკე იგლესიასის ჰიტი Hero შეასრულა, ლონდონში Jamiroquai-სთან ერთად უემბლის სტადიონზე Virtual Insanity იმღერა. მომდევნო საღამოს კი დუა ლიპას Charli XCX შეუერთდა, სადაც არტისტებმა ერთად იმღერეს ჰიტ-სიმღერა 360.
ტურის ერთ-ერთი გამორჩეული მომენტი იყო, როდესაც დუა ლიპამ ლივერპულში The Zutons-ის სიმღერა Valerie ჯგუფის სოლისტ დეივ მაკკეიბისთან ერთად შეასრულა, The Beatles-ის Hey Jude კი მათ მშობლიურ ქალაქში იმღერა. დუბლინში სიმღერა Nothing Compares 2 U დუა ლიპამ გარდაცვლილი ირლანდიელი მუსიკოსის, შინეიდ ო’კონორის ხსოვნას მიუძღვნა.
მომღერალმა ნიუ-იორკში, Madison Square Garden-ში ოთხდღიანი შოუების სერია 21 სექტემბერს დაასრულა, მომდევნო კონცერტები კი მაიამიში, დალასში, ლოს ანჯელესში, სან ფრანცისკოში და სიეტლში გაიმართება.
დუა ლიპას ტურნე – Radical Optimism World Tour არტისტის მესამე ალბომს, Radical Optimism-ს ეძღვნება, რომელიც 2024 წელს Billboard 200-ის ჩარტში მეორე ადგილზე გავიდა. ალბომში შედის ჰიტი Houdini, რომელიც Hot Dance/Electronic Songs-ის ჩარტში 17 კვირის განმავლობაში ლიდერ პოზიციაზე იმყოფებოდა.
