Tamada და DillaNext (ზურა ჯიშკარიანი) ახალ ერთობლივ ტრეკს ავრცელებენ. „სოხუმელი ბიჭი“ – ასე ჰქვია სიმღერას, რომლის მუსიკის ავტორია Tamada, ტექსტი კი ზურა ჯიშკარიანს ეკუთვნის. ჩანაწერში ელექტრო გიტარაზე ლექსო რატიანი უკრავს. სიმღერა 23 სექტემბერს მუსიკალურ ვიდეოსთან ერთად წარადგინეს. კლიპის რეჟისორია შიო ხიდაშელი, ხოლო ფროდაქშენზე კომპანია Industria-მ იმუშავა.
TAMADA 2020 წელს ლაშა ჩხაპელიას მიერ შექმნილი მუსიკალური პროექტია, რომელმაც მსმენელის ყურადღება მალევე მიიპყრო. მისი ნამუშევრები სოციალური, სატირული და რომანტიკული ტექსტებით გამოირჩევა.
ზურა ჯიშკარიანი მწერალი, მუსიკოსი და მულტიმედია არტისტია, რომელიც მუსიკალურ სცენაზე ასევე ცნობილია ფსევდონიმით DillaNext. ქართველი მსმენელი მას არაერთი პროექტიდან იცნობს, მათ შორის არის Kung-Fu Junkie, რომელიც 2007 წელს ჩამოყალიბდა და ათი წლის განმავლობაში ქმნიდა ჟღერადობას, სადაც პანკი, ელექტრონული მუსიკა და ექსპერიმენტული პოეზია ერთმანეთს ერწყმოდა.
