სექტემბერში ედ შირანმა მუსიკალური ვიდეო Camera წარადგინა, რომელშიც Netflix-ის სერიალ Bridgerton-ის ვარსკვლავი ფიბი დაინვორი მონაწილეობს. ვიდეოს შექმნაში ჩართული იყვნენ კრეატიული კომპანია shelter.film და ფროდაქშენ კომპანია Radioactive Shelter, რომლის თანადამფუძნებელი და ხელმძღვანელი ალბერტ ზურაშვილია. shelter.film ალბერტ ზურაშვილმა და მისმა პარტნიორებმა კიევში დააფუძნეს, ამჟამად კომპანია საქართველოდან მთელი მსოფლიოს მასშტაბით ოპერირებს.
რაც შეეხება ვიდეოს, მსახიობი ფიბი დაინვორი ედ შირანის ცოლს, ჩერი სიბორნს განასახიერებს. ვიდეო მათ ურთიერთობაში მნიშვნელოვან მომენტებს აცოცხლებს. შირანმა კლიპის პერსონაჟად მსახიობი სწორედ იმის გამო შეარჩია, რომ პირადი ცხოვრების დაცვა სურდა. ასეთი მხატვრული გადაწყვეტა შირანს და მის ცოლს შესაძლებლობას აძლევდა, რეალური კადრები და მოგონებები კლიპში კინემატოგრაფიული ინტერპრეტაციით, საოჯახო არქივის გაზიარების გარეშე გადაეტანათ.
shelter.film-ს ამ დრომდე არაერთ ცნობილ რეკლამასა და მუსიკალურ ვიდეოზე აქვს ნამუშევარი. მათ შორის არის A$AP Rocky-ს არაერთი ჯილდოს მფლობელი კლიპი Tailor Swif, რომელიც კიევშია გადაღებული.
