არც ისე ბევრ ადამიანს ეძლევა საშუალება, „ოაზისის” ისტორიულ ტურნეს დაესწროს, მაგრამ კიდევ უფრო ცოტას აქვს შანსი, თქვას, რომ ჯგუფის შოუს, არც მეტი, არც ნაკლები, პოლ მაკარტნისთან ერთად უყურეს. ლეონარდო დიკაპრიო კი ერთ-ერთი მათგანია.
ახალ ინტერვიუში მსახიობი აღფრთოვანებით საუბრობს ლიამ და ნოელ გალაგერების კონცერტზე, რომელიც Rose Bowl-ზე სექტწემბრის დასაწყისში შედგა.
„ეს დაუჯერებელი იყო. საოცარია მათი კვლავ ერთად ნახვა,” – ამბობს დიკაპრიო. „პოლ მაკარტნიც იქ იყო და მგონი, Beatles-ის სიმღერაც შეასრულეს. მის გვერდით სექციაში ვიჯექი და მახსოვს, როცა მთელი სტადიონი პოლისკენ შემოტრიალდა და ტაშს უკრავდა. საოცარი იყო. ეს პატივისცემის დიდებული გამოხატულება იყო. ასე რომ, ნამდვილად განსაკუთრებული საღამო შედგა.”
მართლაც, ტურნესთვის „ოაზისმა” The Beatles-ის Octopus’s Garden-ის ნაწილები თავისი სიმღერის, Little by Little-ის დასასრულად დაამატა. 6 სექტემბერს პასადენაში გამართული კონცერტის შემდეგ კი თავად მაკარტნიმ პაპარაცის უთხრა, რომ შოუ გასაოცარი იყო.
„ოაზისის” ტურნეზე ისაუბრა დიკაპრიომაც: „ეს დიდებული ტურნე იყო… ყველა აღტაცებული დარჩა.”
ოსკაროსანმა მსახიობმა გალაგერების გარშემო ატეხილი აჟიოტაჟი რედიოჰედს შეადარა, რომელიც დიკაპრიომ მანამდე მუსიკაში შეტანილი წვლილისთვის შეაქო.
„ოაზისის” Live ’25 ტურნეს დასრულებამდე სულ რამდენიმე თვე რჩება. ტურნე 4 ივლისს ევროპაში დაიწყო. აგვისტოში კი გალაგერები და მათი ბენდი ჩრდილოეთ ამერიკაში გაემგზავრნენ.
ბენდის მომდევნო კონცერტები 27 და 28 სექტემბერს ლონდონში, უემბლის სტადიონზე გაიმართება. ჯგუფი ტურნეს აზიის, ავსტრალიისა და ლათინური ამერიკის ხანმოკლე სერიებით დასრულდება.
