2026 წლის გრემის ცერემონიამდე ოთხ თვეზე მეტი დარჩა, თუმცა ხსოვნისადმი მიძღვნილი სპეციალური სექცია უკვე ერთ-ერთ მთავარ თემად იქცა. წელს მუსიკის არაერთი ლეგენდა გარდაიცვალა, მათ შორის: ბრაიან უილსონი, ოზი ოსბორნი, სლაი სტოუნი და რობერტა ფლეკი. ყველა მათგანს სხვადასხვა დროს მიღებული აქვს ხმისჩამწერი აკადემიის ჯილდო განსაკუთრებული კარიერული მიღწევებისთვის.
ბოლო წლებში გრემი განსაკუთრებულ ყურადღებას ამახვილებს გარდაცვლილი არტისტების გახსენებაზე. შარშან ცერემონიაზე კვინსი ჯონსს მუსიკალური ნომრებით მიაგეს პატივი. 2024 წელს In Memoriam-ის ფარგლებში გრემის ორგანიზატორებმა, ნომინანტებმა და მიწვეულმა სტუმრებმა ტონი ბენეტი, შინეიდ ო’კონორი, კლარენს ავანტი და ტინა ტერნერი გაიხსენეს.
გარდაცვლილ მუსიკოსებს სპეციალური სექციები წინა წლების გრემის დაჯილდოებებზეც ეძღვნებოდა.
და ვის მიაგებენ განსაკუთრებულ პატივს 68-ე გრემის ცერემონიაზე, რომელიც 1-ელ თებერვალს გაიმართება? ოსბორნი, უილსონი და სლაი სტოუნი გამოკვეთილ ფიგურებად მიიჩნევიან, თუმცა სავარაუდოა, რომ ფლეკიც არ დარჩება უყურადღებოდ, მიუხედავად იმისა, რომ ის შედარებით ადრე – წინა წლის შოუდან სამ კვირაში, 2025 წლის 24 თებერვალს გარდაიცვალა. აღსანიშნავია, რომ 1974 წელს ფლეკი გრემის ისტორიაში პირველი არტისტი გახდა, რომელმაც ზედიზედ ორჯერ მოიგო „წლის ჩანაწერის“ ჯილდო.
ფლეკის Killing Me Softly With His Song ანდრა დეიმ BET Awards-ის ცერემონიაზე 9 ივნისს შეასრულა. ოზბორნის პატივსაცემად კი 7 სექტემბერს MTV Video Music Awards-ზე სტივენ ტაილერმა, ჯო პერიმ, იუნგბლადმა და ნუნო ბეტენკურმა სამი სიმღერა წარადგინეს.
