ჯგუფმა Mechanical Rainbow-მ Paper Box Bar-ში წინასწარი ანონსის გარეშე კონცერტი გამართა, რომელზეც დასწრება უფასო იყო. მიუხედავად იმისა, რომ ღონისძიება ძალიან სწრაფად დაიგეგმა, საღამოს ბევრი მსმენელი შეიკრიბა.
დადუ დონაძე, Mechanical Rainbow:
„თავდაპირველად უნდა დაგვეკრა კუს ტბაზე, კლუბ Agora-ში. ვიცოდით, რომ ძალიან ბევრი მსმენელი აპირებდა მოსვლას, თუმცა ორგანიზატორების მხრიდან შეთანხმებული პირობების შეუსრულებლობისა და არასათანადო დამოკიდებულების გამო ივენთის დაწყებამდე სულ ცოტა ხნით ადრე იძულებული გავხდით, უარი გვეთქვა. რა თქმა უნდა, ამ დროს ვფიქრობდით ჩვენს მსმენელზე, რომელიც სწორედ ჩვენ გამო ამოვიდა კუს ტბაზე. ამიტომ ძალიან სპონტანურად გადავწყვიტეთ Paper Box Bar-ში დაკვრა, სადაც შემოსვლა უფასო იყო და ყველას შეეძლო დასწრება. იმ დღეს ბარი საერთოდ დაკეტილი იყო და ჩვენ გამო გააღეს, რისთვისაც დიდი მადლობა მათ. კუს ტბის კონცერტის ორგანიზატორებმა ჩვენ ნაცვლად დაკვრა ჯგუფ Tape Visitors-ს შესთავაზეს, რომლებმაც უარი განაცხადეს და საბოლოოდ ჩვენთან ერთად დაუკრეს – ეს მათი მხრიდან ძალიან მნიშვნელოვანი სოლიდარული ნაბიჯი იყო.”
როგორც ბენდის წევრები ამბობენ, მოკლე დროში მსმენელთან კომუნიკაცია ყოველთვის რთულია, თუმცა ერთგული აუდიტორიის ჩართულობით Paper Box Bar-ის სივრცე მალევე შეივსო.
„ძალიან გაგვიხარდა, რომ მიუხედავად დროის სიმცირისა, ამდენი მსმენელი მოვიდა ლაივზე. რაც შეეხება გაუქმებულ თავდაპირველ კონცერტს – ზოგადად, ძალიან მნიშვნელოვანია, რომ ყველა არტისტმა მკაცრად მოითხოვოს ორგანიზატორებისგან პირობების შესრულება და სათანადო დაფასება. დარწმუნებული ვარ, ჩვენი შემთხვევა მაგალითი იქნება როგორც ორგანიზატორებისთვის, ასევე სხვა არტისტებისთვისაც,” – ამბობს ჯგუფის წევრი ნინი ბენდიანიშვილი.
ამჟამად Mechanical Rainbow ახალ სიმღერებზე მუშაობს, რომლებსაც მსმენელს რამდენიმე თვეში წარუდგენს. რელიზებთან ერთად ჯგუფი უახლოეს მომავალში კონცერტების ჩატარებასაც გეგმავს.
Mechanical Rainbow 2018 წელს ჩამოყალიბდა და მალევე იქცა ქართული მუსიკალური სცენის ერთ-ერთ გამორჩეულ ბენდად. ჯგუფს განსაკუთრებული პოპულარობა მოუტანა სიმღერებმა – HOPE და Sevdanarevi. 2024 წელს Mechanical Rainbow-მ Kordz-თან და სტეფანესთან ერთად წარმოადგინა კომპოზიცია „სდექ“, რომელიც 2024 წლის ზაფხულის ჰიტად იქცა.
