„სოხუმის თეატრის” სამხატვრო ხელმძღვანელმა, რეჟისორმა დავით საყვარელიძემ, პოზიციის დატოვების გადაწყვეტილების შესახებ სოციალურ ქსელში განცხადება გაავრცელა. დავით საყვარელიძემ თავისი ახალი ინიციატივაც დაანონსა: მისი თქმით, იწყებს საერთაშორისო თეატრალურ პროექტს U.K. Georgia Theatre Platform, რომელიც ახალგაზრდებისთვის საგანმანათლებლო პლატფორმა იქნება.
“ძვირფასო მეგობრებო, ახლობლებო, კოლეგებო! მინდა გაგიზიაროთ ჩემთვის მნიშვნელოვანი ამბავი. ვფიქრობ, ამ გადაწყვეტილებას ყველა დაეთანხმება. 2025 წლის პირველი ოქტომბრიდან ვტოვებ სოხუმის კონსტანტინე გამსახურდიას სახელობის სახელმწიფო თეატრის დირექტორის პოსტს. ამას რამდენიმე მიზეზი აქვს. პირველ რიგში, მინდა, რომ ჩვენმა თეატრმა იპოვოს ახალგაზრდა ხელმძღვანელი, რადგან თეატრს სჭირდება ახალი ენერგია და დიდი ენთუზიაზმი. აგრეთვე მსურს, რომ საზოგადოებამ იხილოს მაგალითი იმისა, თუ როგორ უნდა ხდებოდეს თეატრის მართვის გადაბარება ცივილიზებულად – ყოველგვარი დაპირისპირებების გარეშე.
დიდი დროით ერთ ადგილზე მუშაობაც, რბილად რომ ვთქვა, მომხიბვლელად არ გამოიყურება. ახალ ხელმძღვანელს მხარში მთელი გულით ამოვუდგები და ყველანაირად დავეხმარები.
თან, მეც ახალი გამოწვევები მაქვს: ვარ რუსთაველის ეროვნული თეატრის მთავარი რეჟისორი, სადაც რთული სამუშაო მელის. ასევე წინანდალში ახალი დარბაზი შენდება, რომლის მშენებლობის პროცესში აქტიურ მონაწილეობას ვიღებ. მოგეხსენებათ, წინანდლის ფესტივალი რამდენად მნიშვნელოვანია პირადად ჩემთვის. აგრეთვე წამოვიწყე ახალი საერთაშორისო თეატრალური პროექტი U.K. Georgia Theatre Platform, რომელიც საგანმანათლებლო კუთხით იქნება ახალგაზრდებისთვის საინტერესო,” – წერს დავით საყვარელიძე.
იხილეთ სრული პოსტი:
