მას შემდეგ, რაც 29 სექტემბერს არიანა გრანდემ ინსტაგრამზე დონალდ ტრამპის ადმინისტრაცია გააკრიტიკა, პრეზიდენტის წარმომადგენელმა მომღერლის მისამართით საპასუხო კომენტარი გააკეთა.
თეთრი სახლის პრესსპიკერის მოადგილე კუშ დესაი გრანდეს პოსტს პასუხობს და უარყოფს მოსაზრებებს, რომლებიც მომღერალმა ტრამპის მეორე საპრეზიდენტო ვადაში მისი ადმინისტრაციის ქმედებებზე გამოთქვა.
„ცრემლები დაზოგე, არიანა, რადგან პრეზიდენტი ტრამპის ქმედებებმა დაასრულა ჯო ბაიდენის ინფლაციის კრიზისი და ტრილიონების ახალი ინვესტიციები მოიზიდა. მან ხელიც კი მოაწერა ბრძანებას, რომელმაც ფედერალურ სავაჭრო კომისიას გზა გაუხსნა Ticketmaster-ის წინააღმდეგ ზომების მისაღებად, რომელიც ყვლეფდა არიანა გრანდეს კონცერტზე დასწრების მსურველ ფანებს. მალე გამოკეთდი, არიანა!” – ამბობს დესაი.
მაშინ, როცა დესაი ამტკიცებს, რომ პრეზიდენტმა ინფლაციის კრიზისი დაასრულა, აშშ-ის შრომის დეპარტამენტის ამ თვის ანგარიში აჩვენებს, რომ ინფლაცია აგვისტოში 2.9%-ით გაიზარდა და იანვრის შემდეგ სამომხმარებლო ფასების ყველაზე დიდი ზრდა დაფიქსირდა. ამასობაში კი ფედერალურმა სავაჭრო კომისიამ სარჩელი შეიტანა Live Nation-ისა და Ticketmaster-ის წინააღმდეგ, გადასაყიდი ბილეთების ფასებზე მომხმარებლის შეცდომაში შეყვანისთვის.
არიანა გრანდემ აქტივისტ მეტ ბერსტეინის პოსტი გააზიარა, რომელიც ტრამპის მხარდამჭერებს არსებულ პოლიტიკურ ვითარებასთან დაკავშირებით კითხვებით მიმართავდა: „250 დღე გავიდა. ახლა, როცა იმიგრანტებს ძალადობრივად გლეჯენ საკუთარ ოჯახებს და თემები ნადგურდება; ახლა, როცა თითქმის ყველაფერში ტრანსგენდერი ადამიანები დაადანაშაულეს და მათ შიშში უწევთ ცხოვრება; ახლა, როცა ყველა ჩვენგანის სიტყვის თავისუფლება განადგურების პირასაა – გახდა თქვენი ცხოვრება უკეთესი? სხვების მასობრივმა ტანჯვამ მოგიტანათ, რასაც ის გპირდებოდათ, თუ ჯერ კიდევ ელოდებით?” – ვკითხულობთ პოსტში.
