ბენ აფლეკი და ჯენიფერ ლოპესი განქორწინების შესახებ საჯაროდ თითქმის არ საუბრობდნენ, თუმცა, ჯენიფერი CBS-თან, Sunday Morning-ის ჟურნალისტ ლის კაუნთან ახალი ინტერვიუს დროს ამ თემასაც შეეხო. ინტერვიუ მსახიობისა და მომღერლის მომავალი ფილმის რიმეიქს, „ქალი ობობას კოცნას“ ეხებოდა, სადაც ჯენიფერი მთავარ როლს ასრულებს. ამავე ინტერვიუში კი არტისტმა ბენ აფლეკთან განქორწინების შესახებაც ისაუბრა, სადაც აღნიშნა, რომ მისთვის ეს დადებითი გამოცდილება აღმოჩნდა.
ჯენიფერ ლოპესმა ჟურნალისტს განუცხადა, რომ ბენ აფლეკთან განქორწინება ყველაზე კარგი რამ იყო, რაც ოდესმე გადახდენია.
მან ასევე მოიწონა ბენ აფლეკის დამოუკიდებელი, არტისტებზე ორიენტირებული სტუდია Artist Equity, რომელმაც მისი ახალი მუსიკალური დრამის დაფინანსებას შეუწყო ხელი. პროექტის პრემიერა 10 ოქტომბერს იგეგმება.
ჯენიფერ ლოპესმა აღნიშნა: „ვუთხარი ბენს, რომ ეს იყო როლი, რომლისთვისაც დავიბადე და მისი შესრულება მსრუდა, მან კი თანხმობა განმიცხადა და რეალურად დამეხმარა, რომ ეს ყველაფერი შესაძლებელი გამხდარიყო.“
ბენ აფლეკი ამ პროექტის ერთ-ერთი აღმასრულებელი პროდიუსერია. ფილმი არგენტინელი ავტორის, მანუელ პუიგის 1976 წლის რომანის მეორე ეკრანიზაციაა და ორი არგენტინელი პატიმრის ინტიმურ დიალოგებზეა დაფუძნებული.
ჯენიფერ ლოპესმა ფილმის გადაღებას „თავშესაფარი” უწოდა. „ეს თითქოს ერთდროულად საუკეთესო და ამავე დროს ყველაზე რთული პერიოდი იყო. გადაღებების ყოველ მომენტში, როცა ამ როლს ვასრულებდი, იმდენად ბედნიერი ვიყავი, მაგრამ შინ დაბრუნებისას ყველაფერი იცვლებოდა, საკუთარ თავს ვეკითხებოდი “როგორ შევათავსო ეს ყველაფერი?” – აღნიშნა ჯენიფერმა.
შემდეგ კი განქორწინებასთან დაკავშირებით დაამატა: „ეს იყო საუკეთესო რამ, რაც კი ოდესმე გადამხდენია, რადგან მან შეცვალა ჩემი მე, უფრო სწორად, კი არ შეცვალა, დამეხმარა, გავზრდილიყავი. უფრო მეტად განვვითარებულიყავი და საკუთარი თავის გათვითცნობიერება უფრო კარგად შევძელი. მე ახლა სხვა ადამიანი ვარ, ვიდრე შარშან ვიყავი.”
ჯენიფერ ლოპესისა და ბენ აფლეკის რომანი 2002 წელს დაიწყო. წყვილი მაშინ დაინიშნა, თუმცა შემდეგ დაშორდნენ. 2021 წელს კვლავ შეხვდნენ ერთმანეთს და მომდევნო წელს იქორწინეს. 2024 წელს კი განქორწინდნენ.
2025 წლის მარტში, განქორწინებაზე საუბრისას, ბენ აფლეკმა ჟურნალ GQ-ს განუცხადა: „ჯენიფერი ის ადამიანია, რომელსაც დიდ პატივს ვცემ.” მისივე თქმით, მათ განსხვავებული შეხედულებები აქვთ საჯარო და პირად ცხოვრებაზე და არ სურს, ვინმემ იფიქროს, რომ მის მიმართ რაიმე ნეგატიური დამოკიდებულება აქვს.
ბენ აფლეკის თქმით, მათი განქორწინება სკანდალთან ან დრამასთან დაკავშირებული არ იყო: „ეს უბრალოდ ისტორიაა ადამიანებზე, რომლებიც ცდილობენ, საკუთარი ცხოვრება და ურთიერთობები გაარკვიონ ისე, როგორც ამას ყველა აკეთებს.“
