როზეს მაღალი სტანდარტები აქვს, როცა საქმე მის მუსიკალურ კარიერას ეხება. მომღერალმა The Hollywood Reporter-თან ინტერვიუში აღნიშნა, რომ მისი ოცნება გრემის მოგებაა.
ინტერვიუში Blackpink-ის წევრმა საკუთარი რეაქცია გააზიარა მისი და ბრუნო მარსის ჰიტის, APT.-ის გარშემო ატეხილ გრემის აჟიოტაჟზე. „ახლაც მბურძგლავს,” – უთხრა მან გამოცემას. „ეს ჩემთვის ჯერ კიდევ ოცნებად რჩება. ფანტასტიკის სფეროა – მომენტი, რომლითაც საკუთარ თავს ბევრ რამეს დავუმტკიცებ,” – ამბობს მომღერალი გრემის მოგებაზე.
როგორც ჩანს, APT.-ის წარმატება – რომელიც Billboard Global 200-ში 12 კვირის განმავლობაში ლიდერობდა – მას გრემის ნომინანტობის ერთ-ერთ მთავარ კანდიდატად აქცევს ძირითად სასიმღერო კატეგორიებში. თუ როზე და მარსი წლის ჩანაწერის ან წლის სიმღერის ნომინაციებში დასახელდებიან , როზე ისტორიაში პირველი K-პოპ არტისტი გახდება, რომელიც გრემის დიდი ოთხეულის კატეგორიებში იქნება წარდგენილი.
თუკი ვინმე ფიქრობს, რომ მას ეს შეუძლია, პირველ რიგში, ეს თავად როზეს მუსიკალური პარტნიორია. „Big Bad Rosie იმისთვისაა დაბადებული, რომ დიდი საქმეები აკეთოს,” – უთხრა ბრუნო მარსმა THR-ს. „ძალიან ვამაყობ მისით და მადლობელი ვარ, რომ იმ საუბრის ნაწილი ვიყავი, რომელმაც განაპირობა APT.-ის შექმნა და ახალი K-პოპ გიგანტის დაბადება, სახელად ბრუნო მარსი.”
APT. 2024 წლის ოქტომბერს გამოვიდა, როგორც მთავარი სინგლი როზეს სადებიუტო სოლო ალბომისა, სახელწოდებით Rosie. ალბომმა Billboard 200-ში მესამე ადგილი დაიკავა.
სიმღერა და ალბომი Blackpink-ის ერთწლიანი პაუზის დროს გამოვიდა, როცა როზემ, ჯისუმ, ლისამ და ჯენიმ გადაწყვიტეს, ყურადღება სოლო კარიერისთვის დაეთმოთ. მას შემდეგ ისინი კვლავ გაერთიანდნენ მსოფლიო ტურნესთვის, რომელიც ხანმოკლე შესვენების შემდეგ, 18 ოქტომბერს, ტაივანში გაგრძელდება.
სოლო კარიერაზე საუბრისას როზემ THR-ს უთხრა: „არც კი ვიცი, ვხვდებოდი თუ არა, რა მსურდა, მაგრამ ვიცოდი, რომ მინდოდა სამყარო, რომელშიც უკომპრომისო და ნამდვილი მე ვიქნებოდი.”
„იმ დროს 27 წლის გოგო ვიყავი და მინდოდა, ვყოფილიყავი ის, ვინც ვარ. იყო დღეები, როცა თავად მქონდა პრობლემები საკუთარ თავად ყოფნის, სოციალური მედიის სამყაროში ცხოვრებისა და სურვილის, ვყოფილიყავი მიღებული, საყვარელი და ყველასგან დაფასებული.”
