2 ოქტომბერს Texas Sounds International Country Music Awards ფესტივალზე, ტეხასის შტატში, ქართველი მუსიკოსი შოთა ადამაშვილი წარდგება.
ქანთრი მუსიკის საერთაშორისო ფესტივალზე 14 ქვეყანა წარდგება. პირველად ისტორიაში მუსიკოსებს შორის ქართველი არტისტი შოთა ადამაშვილიც გამოვა. ფესტივალი საკონცერტო დარბაზ Memorial City Hall-ში გაიმართება.
„ეს არის საერთაშორისო ფესტივალი Texas Sounds International Country Music Awards, რომელიც სამი დღის მანძილზე – 2, 3 და 4 ოქტომბერს იმართება. ამჯერად, როგორც მახსოვს, 14 ერია წარდგენილი, მათ შორის პირველად საქართველოც. თუ სწორად მახსოვს, ფესტივალი 2013 თუ 2014 წელს დაიწყო, თავიდან იყო პატარა ქალაქ ჯეფერსონში და ახლა მარშალში გადაიტანეს, რომელიც აღმოსავლეთ ტეხასში მდებარეობს. ფაქტობრივად აქ იკვრება ქანთრი მუსიკა, ქანთრის ქვეჟანრები და სხვადასხვა სტილი. ბევრი ბენდი ჩამოდის ევროპიდან, ასევე ყოფილან აფრიკიდან და აზიიდანაც. ყველა გამომსვლელი უსასყიდლოდ უკრავს, თავად აფინანსებენ მგზავრობას და სასტუმროს, იმიტომ, რომ ეს არაკომერციული ორგანიზაციაა, ბილეთებიდან შემოსული თანხა კი სხვადასხვა მისიებს და აქტივობებს ხმარდება. ჩემი გამოსვლა 2 ოქტომბერს, ამერიკის დროით 8 საათზეა დაგეგმილი. თითოეული არტისტი ოთხ სიმღერას ასრულებს და სხვადასხვა ნომინაციაც არსებობს: წლის არტისტი, წლის საავტორო სიმღერა, წლის გიტარისტი და სხვები. გამარჯვების შანსიც არის გარკვეულ კატეგორიაში, მაგრამ ჩემთვის მთავარი ის არის, რომ ამერიკაში არასდროს ვყოფილვარ, ჩემი უდიდესი ოცნება იყო აქ ჩამოსვლა და, რა თქმა უნდა, ადგილობრივ პუბლიკასთან დაკვრა, რადგან მათთვის ქანთრი მუსიკა ძალიან მშობლიურია. ენობრივი ბარიერიც არ არსებობს და სულ სხვა განცდაა ამ მიწაზე ყოფნა, ამერიკული ქანთრის დაკვრა და შეიძლება ითქვას, რომ ცხოვრების ყველაზე დიდი ოცნება ავისრულე. ბენდს რაც შეეხება, ვისთანაც მე დავუკრავ, ეს არის მექსიკიდან ჩამოსული ჯგუფი, რომელიც ე.წ. ჰაუს ბენდად იმუშავებს იმ არტისტებისთვის, რომლებიც მარტო არიან ჩამოსული. ეს ბენდიც არაერთხელ მონაწილეობდა ამ ფესტივალში, ასე რომ, ALAMO country იქნება სცენაზე ჩემი მხარდამჭერი“. – ამბობს მუსიკოსი შოთა ადამაშვილი ,,ბილბორდთან”.
Texas Sounds International Country Music Awards (TSICMA) ყოველწლიური მუსიკალური ფესტივალია, რომელიც მარშალში, ტეხასში ტარდება. სამდღიანი მუსიკალური ღონისძიების ფარგლებში აუდიტორიის წინაშე საერთაშორისო მუსიკოსები წარდგებიან.
