4 ოქტომბერს Saturday Night Live-ში Doja Cat-ის მუსიკალური დებიუტი შედგა. ვარსკვლავი ეპიზოდის მოწვეულ წამყვანთან, Bad Bunny-სთან ერთად გამოჩნდა. ეთერის დროს Doja Cat-ს ქართული მოდის სახლის, KEBURIA-ს სამოსი ეცვა. მან 2025 წლის ე.წ. რეზორტის კოლექციის ერთ-ერთი მოდელი მოირგო.
KEBURIA-ს დამფუძნებელმა და შემოქმედებითმა ხელმძღვანელმა, დიზაინერმა გიორგი ქებურიამ კოლექცია 2024 წელს წარადგინა. კოსტიუმების დიზაინი ფერადოვნებით, სკულპტურული და ექსპერიმენტული ფორმებით გამოირჩევა. „მინდოდა, რომ კოლექცია რაც შეიძლება ფერადი, მხიარული და ამავდროულად სამხედრო სტილით შთაგონებული ყოფილიყო. ვიქტორიანული ელემენტების ჩართვით კი მსურდა, KEBURIA-ს თვალით დანახულ ქალს მეტი შინაგანი სიმტკიცე ჰქონოდა,“ – აღნიშნავს დიზაინერი Hypebae-სთან 2024 წლის ინტერვიუში.
ქებურიას დიზაინით შექმნილ ორეულში გამოწყობილმა Doja Cat-მა SNL-ის სცენაზე წარადგინა ორი ტრეკი თავისი ახალი, მეხუთე ალბომიდან – Vie, რომელიც Billboard 200-ზე მეოთხე ადგილს იკავებს.
Vie 15-სიმღერიანი ალბომია. ტრეკებს შორის არის კოლაბორაცია SZA-თან. ალბომში ასევე შედის სინგლი Jealous Type, რომელიც Doja-მ 2025 წლის VMAs-ზე Kenny G-სთან ერთად შეასრულა. ალბომის გამოშვებიდან მალევე Doja Cat იწყებს Ma Vie World Tour-ს, რაც მსმენელს საშუალებას მისცემს, კიდევ უფრო ახლოს გაეცნოს არტისტის ახალ ნამუშევრებს.
