ჯენიფერ ლოპესმა და ბენ აფლეკმა მონაწილეობა მიიღეს მიუზიკლის – Kiss of the Spider Woman-ის შექმნაში. ყოფილი ცოლ-ქმარი 6 ოქტომბერს ნიუ-იორკში ფილმის პრემიერას ერთად დაესწრო. ეს ვარსკვლავების პირველი საჯარო შეხვედრაა მას შემდეგ, რაც 2025 წლის იანვარში განქორწინების პროცესი ოფიციალურად დასრულეს.
ლოპესი ფილმში ერთ-ერთ მთავარ როლს ასრულებს, ბენ აფლეკისა და მეტ დეიმონის კომპანია – Artists Equity კი პროდიუსერთა შორისაა. ფილმი ეფუძნება არგენტინელი მწერლის, მანუელ პუიგის 1976 წლის ამავე სახელწოდების რომანს, რომლის შთაგონებით 1985 წელს ფილმიც გადაიღეს და 1993 წელს ბროდვეის მიუზიკლი დადგეს.
წითელ ხალიჩაზე გამოცემა Extra-სთვის მიცემულ ინტერვიუში აფლეკმა განმარტა, თუ რატომ ჩაერთო მისი კომპანია Artists Equity ფილმის წარმოებაში და რატომ მიიჩნევს, რომ ლოპესი ამ როლის შესასრულებლად დაიბადა.
„ის უბრალოდ საოცარია ამ ფილმში. ვეღარ ვითმენ, როდის ნახავს მაყურებელი. ამ ნამუშევრით ძალიან ამაყი ვარ,” – აღნიშნა აფლეკმა.
მან ასევე ყურადღება გაამახვილა ყოფილი მეუღლის შრომისმოყვარეობაზე: „თავიდანვე, როცა ჯენიფერი პროექტში ჩაერთო, კარგად ჩანდა, რომ ყველაფერს გააკეთებდა ამ როლისთვის და ზუსტად ასეც მოხდა. უზარმაზარი შრომა ჩადო. ამ ფილმში კარგად ჩანს მისი მრავალმხრივი ნიჭი.“
რაც შეეხება ოსკარის ნომინაციებთან დაკავშირებულ ხმაურს, რომელიც სანდენსის ფესტივალზე ფილმის პრემიერის შემდეგ გავრცელდა, ბენ აფლეკი ამბობს, რომ მისთვის ჯილდოები წარმატების საზომი არ არის: „მირჩევნია, საკუთარი სტანდარტი მქონდეს იმისთვის, რომ შევაფასო, რა მომწონს და რა მიმაჩნია შესანიშნავად. ამ ფილმით უზომოდ ვამაყობ. ყოველთვის ასე იქნება. მიყვარს ეს ფილმი.“
მიუზიკლში – Kiss of the Spider Woman – ასევე მონაწილეობენ დიეგო ლუნა და ტონატიუ, ხოლო რეჟისორი მიუზიკლების ჟანრის გამოცდილი ავტორი ბილ კონდონია, რომლის სახელი დაკავშირებულია ისეთ ცნობილ ნამუშევრებთან, როგორებიც არის Chicago და Dreamgirls. ფილმი Kiss of the Spider Woman კინოთეატრებში პარასკევს გამოვა.
იხილეთ ბენ აფლეკის ინტერვიუ:
