ტეილორ სვიფტის ალბომის – The Life of a Showgirl-ის გაყიდვების მაჩვენებელმა შეერთებული შტატების მასშტაბით უკვე 3.5 მილიონი ე.წ. ალბომის ეკვივალენტური ერთეული შეადგინა. მონაცემებს ანალიტიკური კომპანია Luminate ავრცელებს. მონიტორინგის კვირა ალბომის გამოცემის დღეს, 3 ოქტომბერს დაიწყო და 9 ოქტომბერს სრულდება.
ჯამური რაოდენობიდან ტრადიციული გაყიდვები (ფიზიკური და ციფრული შესყიდვები) შეადგენს ალბომის 3.2 მილიონ ეგზემპლარს, ხოლო 300 000 ერთეული ალბომის სიმღერების სტრიმინგზე მოდის.
3.2 მილიონი ასლით, The Life of a Showgirl უახლოვდება რეკორდს, რომელიც გულისხმობს თანამედროვე ეპოქაში ალბომის ყველაზე მაღალი გაყიდვების მაჩვენებელს ერთ კვირაში. აღსანიშნავია, რომ Luminate-მა მუსიკის გაყიდვების ელექტრონული აღრიცხვა 1991 წელს დაიწყო. ამჟამინდელი რეკორდი ეკუთვნის ადელს, რომლის 2015 წლის ალბომმა, სახელწოდებით – 25 გაყიდა 3.378 მილიონი ასლი.
თუმცა, რადგან The Life of a Showgirl-მა მთლიანობაში 3.5 მილიონი ეკვივალენტური ერთეული დააგროვა, ალბომმა ახალი რეკორდი დაამყარა – ყველაზე დიდი „კვირის მაჩვენებელი“ ეკვივალენტური ალბომის ერთეულების მიხედვით.
რა არის ეკვივალენტური ალბომის ერთეული: ერთი ეკვივალენტური ერთეული უდრის ერთი სრული ალბომის ან ალბომიდან 10 ინდივიდუალური ტრეკის გაყიდვას, ასევე ფასიან სტრიმს. აღსანიშნავია, რომ The Life of a Showgirl-ის ტრეკების ჩამოტვირთვა ცალ-ცალკე არ არის შესაძლებელი, ამიტომ ამ ეტაპზე მისი მთლიანი მაჩვენებელი მხოლოდ ალბომის გაყიდვებსა და სტრიმინგს ეფუძნება.
ცვლილება Billboard 200-ის სისტემაში: 2014 წლის 13 დეკემბრიდან ჩარტმა შეიცვალა ფორმატი – მხოლოდ ალბომის გაყიდვებზე დაფუძნებული რეიტინგიდან გადავიდა მრავალმეტრიკულ სისტემაზე, სადაც შედეგს განსაზღვრავს როგორც ალბომის, ისე ტრეკების გაყიდვები და სტრიმინგი. ამასთანავე, Billboard დღემდე აქვეყნებს მხოლოდ გაყიდვებზე დაფუძნებულ ჩარტებსაც – მათ შორის Top Album Sales, რომელიც მოიცავს როგორც ახალ, ისე ძველ ალბომებს და ასევე Top Current Album Sales-ის ჩარტს. გაყიდვები, სტრიმინგისა და ეთერიდან მიღებული მონაცემები უზრუნველყოფს Billboard-ის ყველა ჩარტის მონაცემების დადგენას. ყველა ციფრი, რომელიც სტატიაშია მითითებული, ეხება მხოლოდ აშშ-ის ბაზარს.
The Life of a Showgirl-ის პირველი კვირის ტრადიციული გაყიდვები ოფიციალურად გამოქვეყნდება 12 ოქტომბერს, როცა Billboard გამოაცხადებს ალბომის სავარაუდო დიდ დებიუტს Billboard 200-ის ჩარტზე და ეს მონაცემები 18 ოქტომბრის ჩათვლით გავრცელდება.
ტეილორ სვიფტის The Life of a Showgirl ტრადიციული ალბომის გაყიდვებში (ფიზიკურ და ციფრულ ფორმატებში) 3 მილიონ ასლს ითვლის. გამოშვების პირველივე დღეს, 3 ოქტომბერს, 2.7 მილიონი ასლი გაიყიდა, რის შემდეგაც Showgirl-მა რეკორდული მაჩვენებლების სიაში მეორე ადგილი დაიკავა, როგორც ალბომმა, რომლის ყველაზე მეტი ასლი გაიყიდა ერთ კვირაში. ამ მაჩვენებლით ის ჩამორჩება მხოლოდ ადელის 25-ს – 2015 წლის პირველ კვირაში ალბომის 3.378 მილიონი ასლი გაიყიდა.
The Life of a Showgirl-ის გაყიდვების მაჩვენებელი შუა კვირაში დამატებით გაზარდა ოთხი ახალი CD ვერსიის გამოშვებამ, რომლებიც ექსკლუზიურად სვიფტის ოფიციალურ ონლაინ-მაღაზიაში განთავსდა. თითოეულ დისკს ჰქონდა განსხვავებული ყდის დიზაინი, 12 ძირითადი ტრეკი და დამატებით ორი უნიკალური ბონუს სიმღერა – ალბომის ტრეკების ალტერნატიული ვერსიები. ასევე ხელახლა გაიყიდა სპეციალური დელუქს ბოქს-სეტი, რომელიც ასევე მხოლოდ სვიფტის ონლაინ-მაღაზიაში იყო ხელმისაწვდომი.
ტეილორ სვიფტი თავადაც აქტიურად იყო ჩართული ალბომის მარკეტინგულ აქტივობაში – ნამუშევარზე მან სხვადასხვა რადიოგადაცემაში ისაუბრა და მონაწილეობა მიიღო NBC-ის შოუში The Tonight Show Starring Jimmy Fallon. მისი ფილმი Taylor Swift: The Official Release Party of a Showgirl 3 ოქტომბერს გამოვიდა აშშ-სა და კანადის კინოთეატრებში და ბილეთების გაყიდვის მაჩვენებლით პირველი ადგილი დაიკავა.
რაც შეეხება სტრიმინგს, ალბომის 12-მა ტრეკმა აშშ-ში მხოლოდ პირველ ორ დღეში 300 მილიონზე მეტი ოფიციალური სტრიმი დააგროვა. სვიფტს უკვე დამყარებული აქვს რეკორდი ერთ კვირაში ყველაზე მეტი სტრიმინგისთვის – მისმა 2024 წლის ალბომმა, The Tortured Poets Department დებიუტის კვირაში 891.37 მილიონ ოფიციალურ სტრიმს მიაღწია.
Showgirl-ის ყველაზე პოპულარული ტრეკი პირველ ორ დღეში გახდა The Fate of Ophelia – 48 მილიონზე მეტი ოფიციალური სტრიმით. ეს მაჩვენებელი, შესაძლოა, მნიშვნელოვნად გაიზარდოს მას შემდეგ, რაც 5 ოქტომბერს სიმღერის ოფიციალური ვიდეო გამოვიდა.
თუ The Life of a Showgirl Billboard 200-ის ჩარტში პირველ ადგილზე გავა, ეს იქნება სვიფტის მეთხუთმეტე №1 ალბომი, რაც მას წამყვან სოლო არტისტად აქცევს – სვიფტი გადაუსწრებს Drake-სა და JAY-Z-ის (ორივეს 14-14 №1 ალბომი აქვთ) და მეორე ადგილზე გადავა საერთო რეკორდებში, სადაც მხოლოდ The Beatles-ს ჩამორჩება, რადგან ბენდს პირველი ადგილის მფლობელი 19 ალბომი აქვს გამოცემული.
ტეილორ სვიფტის ყველა სრული სტუდიური ალბომი და ხელახლა ჩაწერილი პროექტი Billboard 200-ის ჩარტში დებიუტის კვირაში პირველ ადგილს ფლობდა.
ალბომმა The Life of a Showgirl ამერიკის ბაზარზე გამოშვებისთანავე ბრწყინვალე სტარტი აიღო. გამოშვების პირველ დღეს – 3 ოქტომბერს, ალბომმა 2.7 მილიონი ასლი გაყიდა (ფიზიკური და ციფრული ფორმატები), რაც არტისტის კარიერაში ყველაზე დიდი კვირაა და თანამედროვე ეპოქაში მეორე ყველაზე მაღალი შედეგი. ამ მაჩვენებლითაც ის ჩამორჩება მხოლოდ ადელის 25-ს, რომელმაც პირველ კვირაში 3.378 მილიონი ასლი გაყიდა.
Showgirl-მა ასევე დაამყარა ახალი თანამედროვე ეპოქის რეკორდი ერთ კვირაში ყველაზე მეტი ვინილის ასლის გაყიდვისთვის. ამჟამად უკვე გაყიდულია 1.2 მილიონი ვინილი, რითაც სვიფტმა თავისივე 2024 წლის, The Tortured Poets Department-ის რეკორდი მოხსნა.
როგორც Luminate იუწყება, The Life of a Showgirl-ის პირველი კვირის გაყიდვებისა და სტრიმინგის განახლებული მონაცემები მომდევნო დღეებში გამოქვეყნდება.
The Life of a Showgirl ოფიციალურად 12 აგვისტოს დაანონსდა, რის შემდეგაც სვიფტის ოფიციალურ ონლაინ-მაღაზიაში ალბომის წინასწარი შეკვეთების მიღება დაიწყო. ალბომი გამოიცა როგორც სტრიმინგის სტანდარტული ვერსიის სახით, ასევე სამი ფორმატით – CD, ვინილი და ციფრულად ჩამოსატვირთი ვერსია.
Showgirl-ის 2.7-მილიონიანი გაყიდვები მოიცავს როგორც ფიზიკურ, ისე ციფრულ შესყიდვებს. ამ მონაცემებში ასევე შედის დიდი რაოდენობით წინასწარი შეკვეთები. გაყიდვიდან მხოლოდ ერთი დღის შემდეგ The Life of a Showgirl გახდა 2025 წლის ყველაზე გაყიდვადი ალბომი აშშ-ში და გადაუსწრო The Weeknd-ის ალბომს – Hurry Up Tomorrow.
The Life of a Showgirl-ის გაყიდვებს განსაკუთრებულად უწყობს ხელს მისი მრავალფეროვანი ფიზიკური ფორმატები – სხვადასხვა კონფიგურაცია, რომელიც აერთიანებს: 12 CD-ს, 8 ვინილს, 2 დელუქს ბოქს-სეტს (ბრენდირებული ტანსაცმლითა და დისკით) და ერთ კასეტას.
ციფრულ ვერსიებში შედის სტანდარტული ჩამოსატვირთი ალბომი, რომელიც ხელმისაწვდომია ყველა ციფრულ პლატფორმაზე. ასევე აღსანიშნავია iTunes-ზე ექსკლუზიური გამოცემა, რომელიც მოკლე ბონუს ვიდეოსაც შეიცავს.
The Life of a Showgirl-ის ვინილის რვა ვერსიის ჯამურმა გაყიდვამ გამოშვების პირველ დღეს 1.2 მილიონი ასლი შეადგინა, რაც თანამედროვე ეპოქის რეკორდად იქცა. წინა რეკორდიც სვიფტს ეკუთვნის – 859 000 ვინილი, რომელიც 2024 წელს, The Tortured Poets Department-ის პირველი კვირის განმავლობაში გაიყიდა.
The Life of a Showgirl უკვე გახდა ე.წ. მილიონიანი გაყიდვების კლუბის წევრი. Showgirl არის სვიფტის მერვე ალბომი, რომელმაც ერთ კვირაში მინიმუმ 1 მილიონი ასლი გაყიდა. მანამდე ეს შედეგი ჰქონდა სვიფტის ისეთ ალბომებს, როგორებიც არის: The Tortured Poets Department, 1989 (Taylor’s Version), Midnights, reputation, ორიგინალი 1989, Red და Speak Now.
სვიფტი ერთადერთი არტისტია თანამედროვე ეპოქაში, რომელიც ფლობს რვა სხვადასხვა ალბომს ერთ კვირაში მინიმუმ 1-მილიონიანი გაყიდვით. 1991 წლიდან დღემდე, დაფიქსირებულია 27 შემთხვევა, როცა ერთ კვირაში ალბომის 1 მილიონზე მეტი ასლი გაიყიდა.
