2025 წლის 18 ნოემბერს ამერიკაში ქართული კლასიკური მუსიკისთვის მნიშვნელოვანი კულტურული ღონისძება გაიმართება.
ნიუ-იორკის ერთ-ერთ ყველაზე პრესტიჟულ საკონცერტო სივრცეში, Kaufman Center-ის Merkin Hall-ში, ქართველი ჩელისტი სანდრო სიდამონიძე ცნობილი ქართველი კომპოზიტორის, ვაჟა აზარაშვილის ჩელოს კონცერტის პრემიერით წარდგება.
საღამოზე წარმოდგენილი იქნება Orchestra For People, რომელსაც მაესტრო ჰანსოლ კიმი უდირიჟორებს. გაჟღერდება მოცარტისა და ვაჟა აზარაშვილის ნაწარმოებები.
სანდრო სიდამონიძე – ჩელისტი:
„მზადება დიდი ხნის წინ დაიწყო, პროცესში ნამდვილად შევიყვარე ეს კონცერტი. ბედნიერება და დიდი პასუხისმგებლობაა, რომ მას მერკინ ჰოლის სცენაზე ვაჟღერებ. ეს არის დიდი ნაბიჯი ქართული მუსიკისთვის ამერიკაში. ვაჟა აზარაშვილის მუსიკა ძალიან ქართული, ლირიკული და გულწრფელია. მის კონცერტს ნიუ-იორკში პირველად ვასრულებ. ჩემთვის დიდი პატივია საქართველოს კულტურის წარდგენა ამ მასშტაბის სცენაზე.”
აღსანიშნავია, რომ Merkin Hall ათწლეულების განმავლობაში მსოფლიოში აღიარებულ შემსრულებლებსა და ორკესტრებს მასპინძლობს. ახლა კი ამ ისტორიას ქართული მუსიკაც შეემატება – ჟღერადობა, რომელიც ტრადიციასა და ეროვნულ სულისკვეთებას ერთ ემოციად გარდაქმნის.
