მომღერლები სინდი ლოპერი და გრეისი აბრამსი ერთმანეთს ჟურნალ Rolling Stone-ის რუბრიკაში, Musicians on Musicians-ში შეხვდნენ, მათი საუბარი კი გამოცემამ 17 ოქტომბერს გამოაქვეყნა. შეხვედრისას ორივემ შეაქო ერთმანეთი: სინდი ლოპერმა კი გაიხსენა, რომ გრეისი აბრამსის ერთ-ერთმა სიმღერამ მასზე ისე იმოქმედა, რომ ატირდა კიდეც.
„როცა I Know It Won’t Work-ს ვუსმენდი, ცრემლები წამსკდა,“ – თქვა 80-იანების პოპ ლეგენდამ.
„რა? ასე ნუ მეუბნებით… ვერ ვიჯერებ, რომ საერთოდ უსმენდით ჩემს მუსიკას!“ – მიუგო გრეისი აბრამსმა
„ყველაფერს მოვუსმინე,“ – თქვა სიცილით ლოპერმა.
სინამდვილეში, აღტაცება ორმხრივი იყო, გრეისი აბრამსმა გულწრფელად აღნიშნა, რომ ბავშვობიდან ლოპერის მუსიკით იზრდებოდა და განსაკუთრებით აინტერესებდა ის ფაქტი, როცა მომღერალმა კარიერის დასაწყისშივე საკუთარ თავზე აიღო შემოქმედებით პროცესზე სრული კონტროლი.
“უზომოდ მადლიერი ვარ, როგორც ახალგაზრდა ადამიანი, დღეს ყველაფერი რადიკალურად განსხვავებულია, მაგრამ როცა თქვენი შემოქმედებით ვიზრდებოდი, ყველაფერი მიყვარდა, მე მას მანამდე ვაღმერთებდი, სანამ გავიგებდი მის მნიშვნელობას. იცით, რას ვგულისხმობ? რაც უფრო იზრდები და ქალად ყალიბდები, მით უკეთ ხვდები, რა მნიშვნელობა ჰქონდა ამ გზას.“ – უთხრა გრეისი აბრამსმა სინდი ლოპერს.
I Know It Won’t Work გრეისი აბრამსის სადებიუტო ალბომ Good Riddance-შია შესული, ეს კი ერთ-ერთია იმ მრავალი სიმღერიდან, რომლებსაც სინდი ლოპერი განსაკუთრებით აფასებს: „მომწონს ის რიტმი რასაც შენს სიმღერებში ქმნი, ეს სწრაფი ტექსტები საოცრად ეფექტურია.“ – უთხრა ლოპერმა აბრამსს.
მათი საუბარი სწორედ იმ დროს გაიმართა, როცა აბრამსმა მეორე ალბომის The Secret of Us ტურნე დაასრულა. ალბომი Billboard 200-ის ჩარტში მეორე ადგილზე გავიდა. ახლა კი მუსიკოსი სტუდიაში ახალ პროექტზე მუშაობს.
„ალბომის ციკლი დასრულდა, ახალი კი ჯერ არ არის შექმნილი, ჯერ ზუსტად არ ვიცი, რა მინდა ვთქვა.“- თქვა აბრამსმა.
თუმცა სინდი ლოპერმა თავისი გამოცდილებიდან აღნიშნა, რომ შთაგონება აუცილებლად მოვა:
„წინ მთელი ცხოვრებაა, შენი გზა ახლა იწყება. შესანიშნავი იქნება. შენ შეძლებ. შენ დაწერ საკუთარ ისტორიას.“ – უთხრა მან აბრამსს.
