სელენა გომესმა სოციალურ ქსელში გამოაქვეყნა პოსტი, რომლის ადრესატად ბევრმა ჰეილი ბიბერი მიიჩნია. Rhode Beauty ახლა უკვე სილამაზის ინდუსტრიის წამყვან ქსელურ მაღაზიაში – Sephora-შიც იყიდება, სადაც გომესის Rare Beauty-ც არის წარმოდგენილი. რამდენიმე დღის წინ WSJ Magazine-მა ჰეილი ბიბერთან ინტერვიუ ჩაწერა, სადაც მან ისაუბრა Rhode-ს გაფართოებაზე და აღნიშნა, რომ სხვა ბრენდებთან კონკურენციით არ არის დაინტერესებული.
„ყოველთვის გამაღიზიანებელია, როცა სხვებს გადარებენ,” – აღნიშნა მან. „ვფიქრობ, ყველასთვის არის ადგილი. კონკურენციის გრძნობა არ მაქვს იმ ადამიანების მიმართ, ვისგანაც შთაგონებას არ ვიღებ.“
ჰეილი ბიბერის ამ ნათქვამს გარკვეული სპეკულაციები მოჰყვა და სოციალურ ქსელში ზოგიერთი მომხმარებელი წერდა, რომ ის ირიბად სელენა გომესის ბრენდს გულისხმობდა. მალევე გომესმა ინსტაგრამის ე.წ. Story-ში დაწერა:
„უბრალოდ დაანებეთ გოგოს თავი. შეუძლია თქვას, რაც უნდა. ჩემს ცხოვრებაში ეს არაფერს ცვლის. ეს უფრო რელევანტურობაზეა და არა ინტელექტზე. ყველა ბრენდი შთამაგონებს. ყველასთვის არის ადგილი. იქნებ, ბოლოს და ბოლოს, ეს ყველაფერი შევწყვიტოთ.“
მიუხედავად იმისა, რომ სელენა გომესსა და ჰეილი ბიბერს შორის დაძაბულობაზე ხმები წლების განმავლობაში ვრცელდებოდა, ორივემ არაერთხელ უარყო უთანხმოება. 2023 წლის მარტში გომესმა საჯაროდ დაიცვა ბიბერი მას შემდეგ, რაც გაიგო, რომ მის წინააღმდეგ ონლაინ სივრცეში სიძულვილის ტალღა აგორდა.
„ჰეილი ბიბერი დამიკავშირდა და მითხრა, რომ იღებდა სიცოცხლის ხელყოფის მუქარებსა და საშინელ ნეგატიურ დამოკიდებულებას. მე ამას არ ვემხრობი. არავის უნდა მოუწიოს სიძულვილის ან ბულინგის გადატანა. ყოველთვის სიკეთისკენ მოვუწოდებდი ადამიანებს და მართლა მინდა, ეს ყველაფერი დასრულდეს,” – წერდა სელენა გომესი.
