ნიკი მინაჟმა განაცხადა, რომ მის მუსიკალურ კარიერაში ახალი ეტაპი იწყება. რეპერმა სოციალურ ქსელ X-ზე დაწერა, რომ მომდევნო ალბომის გამოშვება 2026 წლის 27 მარტს იგეგმება. ეს იქნება მისი მეექვსე სტუდიური ნამუშევარი, სახელწოდებით NM6.
მინაჟმა აღნიშნა, რომ ალბომის შთაგონება თავისი ტურნეს აუდიტორიიდან მიიღო: „დაგინახეთ, გისმენდით, გიგრძენით, მიყვარხართ,“ – დაწერა არტისტმა და დაამატა, რომ სწორედ ამ ადამიანებისთვის სურს ახალი მუსიკის შექმნა. მინაჟმა ასევე აღნიშნა, რომ ახალი ნამუშევრით მას ყოველთვის შეუძლია, ცვლილებები გამოიწვიოს მუსიკალურ ინდუსტრიაში. მეექვსე სტუდიური ალბომის შემდეგ ის შესაძლო ახალ ტურნეზე, დოკუმენტურ ფილმებსა და აუდიოწიგნებზეც მიანიშნებს.
18 ოქტომბერს მინაჟმა სოციალურ ქსელში საკუთარი თავი მოიხსენია, როგორც „Billionaire Barbie“ („მილიარდერი ბარბი”), თუმცა, ოფიციალური მონაცემებით, მისი ქონება დაახლოებით 190.5 მილიონ დოლარს შეადგენს, რაც მას ყველაზე მდიდარ ქალ რეპერად აქცევს, თუმცა მილიარდერის სტატუსამდე შორს არის. ამ პოსტის შემდეგ Billboard-მა რეპერის ოფიციალურ წარმომადგენლებს კომენტარისათვის მიმართა.
ცოტა ხნის წინ მინაჟმა ფანებს მიანიშნა, რომ შესაძლოა, ალბომის გამოშვება გაეუქმებინა, რადგან უთანხმოება ჰქონდა Jay-Z-სთან და Roc Nation-თან. „მოდიოდნენ და მთხოვდნენ ტურნესა და ალბომზე თანხმობას, მაგრამ უარი ვთქვი,“ – დაწერა მან პოსტში.
მინაჟის ბოლო ალბომი Pink Friday 2 2023 წლის დეკემბერში გამოვიდა და 228 000 გაყიდული ერთეულის ეკვივალენტით Billboard 200-ის ჩარტში პირველი ადგილი დაიკავა.
