Snoop Dogg-მა მუსიკალურ პროექტ „ვოისში” პირველად გამოიყენა ე.წ. „მოპარვის” უფლება მას შემდეგ, რაც ემოციებით დატვირთულ დუელის ტურში ნაილ ჰორანმა შემდეგ ეტაპზე კირბი გადაიყვანა.
ჰორანმა თავისი გუნდიდან კირბი და კაროლინა როდრიგესი დააწყვილა. კონკურსანტებმა ლორენ დეიგლის გრემის მფლობელი სიმღერა You Say შეასრულეს.
„ძალიან ლამაზი იყო,” – თქვა ჰორანმა. „ემოციური იყო, ყველაფერი იყო, რისი ნახვაც დუელის ტურში გვსურს. ყველაზე ძნელი ის არის, რომ თქვენ ორნი ძალიან კარგი მეგობრები გახდით. კირბი, შენი ხრინწი ზედა რეგისტრში ისეთი ლამაზია… ბევრ ადამიანს არ შეუძლია ეს. როგორც სნუპმა თქვა, ვეტერანივით გამოიყურებოდი. კაროლინა, ის, თუ როგორ დაიწყე სიმღერა დაბალ რეგისტრში, ძალიან შთამბეჭდავი იყო.”
საბოლოოდ ჰორანის რჩეული კირბი გახდა: „მან მომცა ის ემოცია, რომელიც ამ სიმღერისგან მინდოდა.” თუმცა სანამ კაროლინა დარბაზს და, შესაბამისად, პროექტს დატოვებდა, სნუპმა ხელი „მოპარვის” ღილაკს დააჭირა, რაც იმას ნიშნავს, რომ ჰორანის გუნდის ყოფილი წევრი რეპერმა საკუთარ გუნდში წაიყვანა.
„ის, რაც კაროლინაში მომწონს, არის მისი ზრდა ბრმა კასტინგიდან დღემდე. შეიძლება ითქვას, რომ ის უკვე მზადაა,” – თქვა რეპერმა.
ამავე ეპიზოდში მაქს ჩემბერსმა და აარიკ დანკანმა Just the Two of Us შეასრულეს და სნუპისგან მათ შორის არსებული ქიმიისთვის ქება დაიმსახურეს. „თქვენ ერთმანეთი შეავსეთ, ნაცვლად იმისა, რომ ერთმანეთისთვის გეჯობნათ,” – აღნიშნა რეპერმა და გაამხილა, რომ მისი რჩეული ამ შემთხვევაში მაქსი იქნებოდა. მას ჰორანიც დაეთანხმა: „აარიკ, შენ ეს სიმღერა სულ სხვა დონეზე აიყვანე. მაქს, შენ კი სრულიად ბუნებრივი ხარ.”
დუელების ტურში სცენაზე ასევე წარდგნენ ეიდენ როსისა და ავა ნატის წყვილი, რომლებმაც ნაილ ჰორანის What a Time შეასრულეს; ლეიტონ რობინსონი და მენი კოსტელო კრის სტეპლტონის სიმღერით Think I’m in Love With You; ვინია ჩაბრა და კონრად ხალილი სიმღერით It Takes Two და სნუპის გუნდის წევრები ემანუელ რეი და მინდი მილერი, რომლებმაც Angel From Montgomery იმღერეს.
