ავსტრალიური „ბუშ-მუსიკის”, იგივე ქანთრი მუსიკის ლეგენდამ, ჯონ უილიამსონმა საჯაროდ გააკრიტიკა ანტიიმიგრაციის მასშტაბური აქცია, სადაც მისი ცნობილი სიმღერა „True Blue“ თანხმობის გარეშე გააჟღერეს.
19 ოქტომბერს ათასობით ადამიანი ავსტრალიის რამდენიმე დედაქალაქში, „March for Australia“-ს სახელით გამართულ საპროტესტო აქციაზე შეიკრიბა. შეკრებილმა მოქალაქეებმა ავსტრალიის ფედერალური მთავრობის მიგრაციის პოლიტიკა გააპროტესტეს. როგორც თავად უილიამსონი ამბობს, ეს პირველი შემთხვევა არ არის, როცა მისი მუსიკა უნებართვოდ გამოიყენეს.
„True Blue არის სიმღერა ყველა ავსტრალიელისთვის და არ უნდა გამოიყენონ ისეთმა ჯგუფებმა, რომლებსაც საზოგადოების დაყოფა სურთ. მე მჯერა მრავალკულტურული საზოგადოების, სადაც ყველა ავსტრალიელი ერთიანდება ჩვენი უნიკალური კულტურისა და თავისუფლებების გარშემო,” – დაწერა უილიამსონმა სოციალურ ქსელში.
დაახლოებით ათი წლის წინ არტისტმა გააკრიტიკა კონსერვატიული ღონისძიებების ორგანიზატორები, რომლებიც მის ცნობილ სიმღერას პოლიტიკურ ინსტრუმენტად იყენებდნენ. 2015 წელს მან სოციალურ ქსელში დაწერა, რომ „True Blue“ სხვადასხვა ჯგუფის, მათ შორის Reclaim Australia-ს მოძრაობის მიერ ორგანიზებულ შეხვედრებზე ჟღერდებოდა მისი თანხმობის გარეშე. მაშინ უილიამსონმა აღნიშნა: „მე მირჩევნია, ეს სიმღერა ჩვენი დიდი ქვეყნის ერთიანობის აღსანიშნავად გამოიყენონ. რა იქნება, გავმართოთ აქცია, რომელიც სიყვარულს ეძღვნება? მოდით, ვნახოთ, ვინ მოვა.”
უილიამსონი ცნობილი მუსიკოსი და ბუნების დამცველია და უკვე 50 წელზე მეტია, სცენაზეა. 79 წლის არტისტს 5 მილიონზე მეტი ალბომი აქვს გაყიდული. წლების განმავლობაში მან მოიპოვა 28 „Golden Guitar“-ის ჯილდო, 4 ARIA Award (ავსტრალიური ხმისჩამწერი ინდუსტრიის ასოციაციის მუსიკალური ჯილდო) და 1992 წელს გახდა Order of Australia-ს წევრი. მას ეს სტატუსი ავსტრალიური ქანთრი-მუსიკისთვის გაწეული სამსახურისა და გარემოსდაცვითი ცნობიერების ამაღლებისთვის მიენიჭა.
უილიამსონმა 2000 წლის სიდნეის ოლიმპიადის გახსნის ცერემონიაზეც იმღერა, ხოლო 2010 წელს ARIA-ს დიდების დარბაზში შეიყვანეს.
1982 წელს გამოსვლის შემდეგ, True Blue ავსტრალიური კულტურის განუყოფელ ნაწილად იქცა. მას ხშირად უკრავენ სპორტულ ღონისძიებებსა და ცერემონიებზე.
