22 ოქტომბერს ჟურნალ People-ში ელიზაბეტ ტეილორის ვაჟის, ქრისტოფერ უაილდინგის ინტერვიუ გამოქვეყნდა, სადაც ქრისტოფერმა ტეილორ სვიფტის სიმღერაზეც ისაუბრა, რომელიც მისი დედის, ელიზაბეთ ტეილორის სახელს ატარებს.
„ტეილორი და დედაჩემი მონათესავე სულებს ჰგვანან. ორივე ქალის სიძლიერის განსახიერებაა. ტეილორ სვიფტმა საოცარი სიზუსტით წარმოაჩინა პარალელები მათ კარიერასა და პირად ცხოვრებას შორის, რაც საოცრად სასიამოვნოა.“ – აღნიშნა ქრისტოფერმა, რომლმაც სიმღერას – Elizabeth Taylor გამოსვლისთანავე მოუსმინა.
ტეილორ სვიფტის მიერ ჰოლივუდის ლეგენდისადმი მიძღვნილი სიმღერა 3 ოქტომბერს გამოვიდა. ის სვიფტის მე-12 სტუდიური ალბომის, The Life of a Showgirl-ის მეორე სინგლია. ალბომის დებიუტი Billboard 200-ის ჩარტში პირველი პოზიციით შედგა და პირველივე კვირაში 4 მილიონზე მეტი ეგზემპლარი გაიყიდა. სიმღერა Billboard Hot 100-ის მესამე ადგილზე გავიდა.
„როგორც დედა იყო მისთვის სამაგალითო, მჯერა, ტეილორ სვიფტიც თავისი თაობისთვის შთამაგონებელი, მისაბაძი ადამიანი იქნება. მისი მხარდაჭერა LGBTQ+ უფლებებისადმი და ქველმოქმედებაში ჩართულობა, დარწმუნებული ვარ, დედაჩემში აღფრთოვანებას გამოიწვევდა.“ – დასძინა ქრისტოფერმა.
ტეილორ სვიფტი დიდი ხანია, ელიზაბეტ ტეილორით მოჯადოებულია. ალბომ Reputation-ის წამყვან სინგლში …Ready for It? მომღერალმა ტეილორისა და რიჩარდ ბერტონის რომანზეც მიანიშნა:
„And he can be my jailer, Burton to this Taylor / Every love I’ve known in comparison is a failure.“
ტეილორ სვიფტმა Pandora-სთან ვიდეოში განმარტა, თუ რატომ გადაწყვიტა ალბომში Showgirl ელიზაბეტ ტეილორისადმი პატივისცემა გამოეხატა:
„ჩემმა მშობლებმა გამომიგზავნეს ვიდეოჩანაწერი, სადაც ელიზაბეტ ტეილორის ვაჟი, ქრისტოფერი, ამბობს ძალიან სასიამოვნო რამეს, რომ თუ თანამედროვე ეპოქაში არსებობს ადამიანი, ვისაც დედას შეადარებდა თავისი პერსონითა და გარშემო არსებული ქაოსით, ეს მე ვიქნებოდი. ეს შეფასება ძალიან სასიამოვნო იყო და სიამაყით ავივსე.” – ამბობს სვიფტი ვიდეოში.
