ცნობილი ქართველი ვიოლინისტი ლიზა ბათიაშვილი 2026 წლის ოქტომბრიდან ზალცბურგის “მოზარტეუმის უნივერსიტეტში” პროფესორის პოზიციას დაიკავებს.
უნივერსიტეტის ოფიციალური განცხადების მიხედვით, ბათიაშვილი, რომელიც ერთნაირი აღიარებით სარგებლობს როგორც მსმენელებს, ისე კოლეგებს შორის, უნივერსიტეტს თავისი გამორჩეული ვირტუოზულობითა და მუსიკალური ნიჭით უერთდება.
„ჩემთვის უდიდესი პატივი და ძალიან მნიშვნელოვანი ნაბიჯია ზალცბურგის ,,მოზარტეუმის უნივერსიტეტში” პროფესორის პოზიციის დაკავება,“ – წერს მუსიკოსი. „ეს ჩემი ცხოვრების ახალი და ამაღელვებელი ეტაპია. ველი შესაძლებლობას, გავუზიარო სტუდენტებს ჩემი გამოცდილება და სიყვარული მუსიკისადმი. გულწრფელად მადლიერი ვარ ყველასი, ვინც ამ გზაზე მხარი დამიჭირა – თქვენ გარეშე ეს შესაძლებლობა რეალობად ვერ იქცეოდა.“
ბათიაშვილი წლების განმავლობაში თანამშრომლობს მსოფლიოს წამყვან ორკესტრებთან, დირიჟორებთან და სოლო არტისტებთან. მუსიკოსმა ხაზი გაუსვა, რომ მოუთმენლად ელის ახალგაზრდა მუსიკოსებთან შეხვედრას და ახალ გამოწვევებს: „მომავალი სავსეა შთამაგონებელი თანამშრომლობებითა და ახალი იდეებით ზალცბურგში,” – ვკითხულობთ ბათიაშვილის პოსტში.
Universität Mozarteum Salzburg მსოფლიოს ერთ-ერთი ყველაზე პრესტიჟული მუსიკალური აკადემიაა, სადაც სწავლობდნენ და ასწავლიდნენ კლასიკური მუსიკის ცნობილი ფიგურები.
