დევიდ ბოლი, ცნობილი ინგლისური სინთ-პოპ დუეტ Soft Cell-ის თანადამფუძნებელი, 66 წლის ასაკში გარდაიცვალა. ინსტაგრამზე გავრცელებული პოსტის მიხედვით, მუსიკოსი 22 ოქტომბერს საკუთარ სახლში ძილის დროს გარდაიცვალა.
ახალ ამბავს გამოეხმაურა Soft Cell-ის ვოკალისტი მარკ ალმონდი, რომელთანაც ბოლს 46-წლიანი მუსიკალური პარტნიორობა აკავშირებდა. ალმონდმა მას „საოცარი მუსიკალური გენიოსი” უწოდა და აღნიშნა, რომ მიუხედავად იმისა, რომ ამ ამბის გააზრება უჭირს, ამასთანავე შვებას პოულობს იმ ფაქტში, რომ ბოლო დროს ბოლი „დიდებულ ემოციურ მდგომარეობაში იყო”.
„ძალიან ფოკუსირებული და ბედნიერი იყო ახალი ალბომით, რომელიც ზუსტად რამდენიმე დღის წინ დავასრულეთ. ეს ძალიან სამწუხარო ამბავია, რადგან 2026 წელი მისთვის ამაღლებული უნდა ყოფილიყო, თუმცა გარკვეულწილად შვებასაც ვგრძნობ იმის გამო, რომ მან მოასწრო დასრულებული ჩანაწერის მოსმენა და ფიქრობდა, რომ ეს შესანიშნავი ნამუშევარი იყო,” – ამბობს ალმონდი და წერს, რომ ბოლის ბოლო კომპოზიციები საუკეთესო იყო, რაც კი ოდესმე შეუქმნია.
მუსიკოსის გარდაცვალების მიზეზი არ დასახელებულა.
დევიდ ბოლმა ყველაზე დიდი წარმატება 1981 წელს მოიპოვა გლორია ჯონსის 1964 წლის სიმღერის, Tainted Love-ის ქავერის შესრულებით, რომელიც დუეტის სადებიუტო და ყველაზე საყვარელ ალბომ Non-Stop Erotic Cabaret-ში შევიდა. სინთ-პოპის პიონერ დუეტს მომღერალი ალმონდი უძღვებოდა თავისი დრამატული ვოკალით, მაგრამ სწორედ ბოლი იყო ის, ვინც წერდა და ასრულებდა ბენდის თითქმის ყველა dark dance კომპოზიციას იმ პერიოდში, როცა სინთმუსიკა თავს იმკვიდრებდა, როგორც ჟანრი და სატელევიზიო ეთერებისა და ჩარტების ლიდერი ხდებოდა ისეთი ბენდების წყალობით, როგორებიც არიან Erasure, Eurythmics, Pet Shop Boys, Depeche Mode, Duran Dura და სხვები.
Soft Cell 1979 წელს დაარსდა, როცა ბოლი და ალმონდი ერთმანეთს უნივერსიტეტში შეხვდნენ. 1982-2021 წლებში ბენდმა ოთხი სტუდიური ალბომი გამოსცა. მათი ყველაზე დიდი ჰიტის, Tainted Love-ის გარდა, რომელიც დიდი ბრიტანეთის სინგლების ჩარტის ლიდერი გახდა, 43 კვირა გაატარა Billboard Hot 100-ში და მსოფლიოს მასშტაბით 21 მილიონი ეგზემპლარი გაიყიდა, ჯგუფს დიდი ბრიტანეთის სინგლების ჩარტის ტოპ ათეულში შესული კიდევ ოთხი სიმღერა აქვს.
მუსიკოსის გარდაცვალებამდე რამდენიმე კვირით ადრე წყვილი England Rewind Festival-ის ჰედლაინერი იყო, სადაც, „ბიბისის” ცნობით, ბოლი სცენაზე ეტლში მჯდომი წარდგა. ბოლო ორი წლის განმავლობაში მას ჯანმრთელობის პრობლემები ჰქონდა ხერხემლის დაზიანების გამო, რომელიც 2023 წელს, დაცემის შემდეგ მიიღო, რის შედეგადაც ასევე ხუთი ნეკნი და მაჯა მოიტეხა. ბოლოს მუსიკოსს პნევმონია და სეფსისი განუვითარდა, რის გამოც ის ხელოვნურ კომაში იმყოფებოდა.
დევიდ ჯეიმს ბოლი 1959 წლის 3 მაისს ინგლისში, ჩეშირში დაიბადა. ის 18 თვის ასაკში გააშვილეს. Soft Cell-ის გარდა, რომელიც 1984 წელს დაიშალა და 2001 წელს კვლავ გაერთიანდა, მას გამოცემული აქვს სოლო ალბომი In Strict Tempo, ასევე უკრავდა ხანმოკლე ბენდებში და თანამშრომლობდა ექსპერიმენტულ გუნდთან Psychic TV. 1988 წელს რიჩარდ ნორისთან ერთად მან შექმნა დუეტი The Grid, რომლის ფარგლებშიც წყვილმა ექვსი ალბომი გამოსცა.
