ICMP (International Confederation of Music Publishers) კონფერენციის ფარგლებში საავტორო უფლებებთან დაკავშირებული მსოფლიოს მასშტაბით მიმდინარე აქტუალური საკითხები განიხილება. ღონისძიებაზე აქტიური დისკუსია იმართება მუსიკალური ინდუსტრიის დაცვისა და განვითარების გზების შესახებ.
ICMP წარმოადგენს მუსიკალური ინდუსტრიის ინტერესების დამცველ ერთ-ერთ უმნიშვნელოვანეს გლობალურ ორგანიზაციას, რომელიც აქტიურად თანამშრომლობს ევროინსტიტუციებთან საავტორო უფლებების დაცვის მიმართულებით.
Music Minds-ის კონფერენციაში ტრადიციულად მონაწილეობენ მუსიკალური ინდუსტრიის უმსხვილესი კომპანიების ხელმძღვანელები, მათ შორის Universal Music Publishing Group, Sony Music Publishing, Warner Chappell Music, Kobalt Music Group, BMG და სხვა.
კონფერენციის ისტორიაში წელს პირველად საქართველოდან მომხსენებლად GMI Rights Management-ის დირექტორი ზუკა ბეჟაშვილი წარდგება.
12 ნოემბერს ქალაქ ზაგრებში, პანელის ფარგლებში, GMI Rights Management-ის დირექტორი საქართველოში საავტორო და მომიჯნავე უფლებების სფეროში არსებულ ვითარებაზე, მიმდინარე გამოწვევებსა და ანტი-პირატული მიმართულებით მიღწეულ პროგრესზე ისაუბრებს.
ზუკა ბეჟაშვილი – GMI Rights Management-ის დირექტორი:
„ჩემთვის დიდი პატივია, ვიყო საქართველოს წარმომადგენელი და ინტერესების დამცველი ამ დონის კონფერენციაზე. მუსიკალური გამომცემლობების ინდუსტრიაში ამაზე მნიშვნელოვანი ღონისძიება არ არსებობს. მრავალწლიანი მუშაობის შედეგად შევძელი და საქართველოს სახელი ღირსეულად წარმოვაჩინე მუსიკალური ინდუსტრიის არაერთი მაღალი დონის შეხვედრაზე, დღეს კი უკვე მივიღე მოწვევა, რომ ზაგრებში წარვდგე მომხსენებლად. ეს ჩვენი ქვეყნისთვის დიდი აღიარება და შესაძლებლობაა, რომ საქართველოს სახელი ფართოდ იქნას გატანილი მსოფლიოს მუსიკალურ ინდუსტრიაში, გავაჩინოთ მეტი ინტერესი და გავაჟღეროთ ქართველი ავტორების ხმა მსოფლიო დონეზე.”
