25 ოქტომბერს თბილისში მიხეილ თუმანიშვილის სახელობის ხელოვნების საერთაშორისო ფესტივალი „საჩუქარი” იხსნება. წელს ფესტივალი 28-ედ იმართება და, ტრადიციულად, მაყურებელს გამორჩეულ პროგრამას სთავაზობს.
ფესტივალს გახსნის ლეგენდარული იაპონური ბუტოს თეატრალური კომპანიის, Sankai Juku-ს წარმოდგენა Meguri, რომელსაც თბილისის ოპერისა და ბალეტის თეატრი უმასპინძლებს. პროექტი იაპონიის მთავრობის მხარდაჭერით ხორციელდება.
წლევანდელი გამოშვება განსაკუთრებულ ყურადღებას დაუთმობს თანამედროვე იტალიურ თეატრსა და წარმოდგენით ხელოვნებას. „იტალიური ფოკუსის” ფარგლებში, იტალიის საელჩოს მხარდაჭერით, სპეციალური პროგრამა მიეძღვნება ემილია-რომანიის რეგიონს, რომელიც კულტურული სიახლეებისა და ინოვაციური თეატრალური ტენდენციების ერთ-ერთ ცენტრს წარმოადგენს.
ფესტივალის პერიოდში თუმანიშვილის თეატრი ორკვირიან სახელოსნოს უმასპინძლებს, რომელიც იტალიელ ხელოვანებსა და თუმანიშვილის თეატრის დასს შორის შედგება. ფოკუსის ფარგლებში ასევე გაიმართება ცნობილი იტალიელი მწერლის, პოეტისა და დრამატურგის, მარკო მარტინელისა და ერმანა მონტანარის სამდღიანი სახელოსნო ქართველ პოეტებთან და ლიტერატორებთან. გარდა ამისა, შედგება ლეგენდარული იტალიელი მსახიობის, ერმანა მონტანარის სპექტაკლის „მადრე“ (დედა) და მარკო მარტინელის ფილმის, Er-ის ჩვენება.
წელს ფესტივალს კიდევ ერთი ახალი პროგრამა შეემატება: „ბასკურ-ქართული კულტურული გზაჯვარედინი: კავკასიიდან პირენეებამდე”, რომელიც საქართველოს კულტურის სამინისტროსა და ესპანეთის სახელმწიფოს კულტურული სააგენტოს მხარდაჭერით ხორციელდება. პროექტის ფარგლებში ერთმანეთს დაუკავშირდება თანამედროვე ბასკური ცეკვა Kukai Dantza და ქართული მრავალხმიანობა. ამასთანავე, ბასკეთიდან თბილისს ეწვევა თეატრალური კომპანია „კულუნკა”, რომელიც ქართველ მაყურებელს თავის ცნობილ წარმოდგენას, André & Dorine-ს წარუდგენს.
საფესტივალო პროგრამის პარალელურად, „საჩუქარი” კვლავ განაგრძობს ახალი თაობის ხელოვანების მხარდაჭერას. გრძელდება ასევე პროგრამა GIFT Biennale College.
2025 წლის კიდევ ერთი მნიშვნელოვანი სიახლეა ის, რომ მიხეილ თუმანიშვილის სახელობის ფესტივალი „საჩუქარი” ოფიციალურად უკვე თავად თუმანიშვილის კინომსახიობთა თეატრს გადაეცა.
ფესტივალის პროგრამა და ბილეთები იხილეთ ბმულზე.
