25 ოქტომბერს ცნობილი ჯგუფის, Daft Punk-ის წევრმა თომას ბანგალტერმა და Fred again..-მა ერთად დაუკრეს Because Beaubourg-ის ღონისძიებაზე. ეს იყო ორდღიანი ფესტივალი, რომელიც ფრანგული ლეიბლის, Because Music-ის 20 წლის იუბილეს ეძღვნებოდა. ფესტივალი პარიზში, პომპიდუს ცენტრში ჩატარდა. არტისტებთან ერთად სცენაზე გამოდიოდნენ დიჯეები ეროლ ალკანი და Busy P.
ეს გამოსვლა ბანგალტერისთვის პირველი DJ სეტი იყო ბოლო 16 წლის განმავლობაში. როგორც გამოცემა NME იუწყება, ღონისძიების დროს ფრანგმა მუსიკოსმა დაუკრა Daft Punk-ის კლასიკური ტრეკების მიქსი, მათ შორის Contact, Rollin’ & Scratchin’ და Digital Love, ასევე The Chemical Brothers-ის Galvanise და ჯონი გრინვუდის კომპოზიცია – One Battle After Another.
Because Beaubourg-ის ფესტივალი პომპიდუს ცენტრში ჩატარებული ბოლო საღამო იყო. სახელოვნებო სივრცე ხუთი წლის ვადით რემონტისთვის იკეტება. ღონისძიების პირდაპირი ტრანსლაცია ინტერნეტშიც გადაიცემოდა.
„გუშინ საღამოს თომას ბანგალტერთან, ეროლ ალკანთან და Busy P-ისთან ერთად პომპიდუში დავუკარი,“ – დაწერა Fred again..-მა ინსტაგრაზე. „თომასმა ლიფტში, შოუსკენ მიმავალ გზაზე მითხრა, რომ პირველად ელექტრონული მუსიკა 1992 წელს, სწორედ ამ შენობაში შეუყვარდა. მან ასევე მითხრა, რომ უკანასკნელად ნიღბის გარეშე სრულფასოვანი სეტი 24 წლის წინ დაუკრა. ამაზე რა მეთქვა, არ ვიცოდი, ახლაც არ ვიცი. უბრალოდ ვუთხარი, რომ იმედი მაქვს, შემდეგ შემთხვევამდე კიდევ 24 წელი არ გავა.“
ელექტრონული მუსიკის ვარსკვლავებმა კომენტარებში აღფრთოვანება გამოთქვეს: „ლეგენდარულია!!“ – დაწერა Tiësto-მ. კომენტარების ველში ამ ამბავს ასევე გამოეხმაურა დევიდ გუეტაც, რომელმაც აღტაცება გამოხატა.
Daft Punk-ის უკანასკნელი ცოცხალი გამოსვლა 2017 წლის გრემის ცერემონიაზე გაიმართა The Weeknd-თან ერთად. 2021 წელს ფრანგულმა დუეტმა დაშლის შესახებ ოფიციალურად განაცხადა. რაც შეეხება ბანგალტერს, მან იმუშავა არაერთ პროექტზე – მათ შორის ფრანგულ ბალეტზე და სალვადორ დალის შთაგონებით შექმნილ კომედიურ ფილმზე.
