Radiohead-ის სოლისტი ტომ იორკი ბენდის ხანგრძლივ შემოქმედებით პაუზაზე საუბრობს. მიზეზად კი მუსიკოსი პირად დანაკარგსა და ემოციურ გადაწვას ასახელებს.
The Times-ისთვის მიცემულ ახალ ინტერვიუში იორკი ბენდის 2018 წლის A Moon Shaped Pool ტურნეს ბოლო დღეებს იხსენებს, რომელიც აგვისტოში ფილადელფიის კონცერტით დასრულდა.
„ყველაფერი თითქოს მწყობრიდან გამოვიდა, ასე რომ, გაჩერება მოგვიწია,” – ამბობს მუსიკოსი. „კონცერტები კარგად მიდიოდა, მაგრამ ვიფიქრეთ, რომ პაუზა უნდა აგვეღო, სანამ კლდიდან გადავიჩეხებოდით.”
ცოტა ხნის წინ ბენდმა განაცხადა, რომ სცენას დაუბრუნდებოდა შეზღუდული 20 კონცერტით ევროპის ხუთ ქალაქში: მადრიდში, ბოლონიაში, ლონდონში, კოპენჰაგენსა და ბერლინში. ტურნე 4 ნოემბერს დაიწყება.
იორკმა ასევე ისაუბრა თავის პირად ტრაგედიაზე – 2016 წელს მისი პირველი მეუღლის, რეიჩელ ოუენის გარდაცვალებაზე. „ყველა შემთხვევაში უნდა გავჩერებულიყავი, რადგან მე საკუთარი თავისთვის გლოვის დრო არ მიმიცია. ეს მწუხარება კი სხვადასხვაგვარად იჩენდა თავს, რამაც მაფიქრებინა, რომ გაჩერება მჭირდებოდა.”
მუსიკოსმა დაამატა, რომ მაშინ, როცა მუსიკა განკურნების გზაა, ამავდროულად ის მტკივნეული შეხსენებაა: „ყოფილა მომენტები ჩემს ცხოვრებაში, როცა შვება მუსიკაში მიძებნია და ფორტეპიანოზე დამიკრავს, მაგრამ ეს ძალიან მტკივნეულია, ფიზიკურადაც კი. მუსიკა მტკივნეულია, რადგან ამ დროს შენს ტრავმას გადიხარ.”
გიტარისტმა ედ ობრაიენმა ასევე გულახდილად ისაუბრა, თუ რამდენად მძიმე იყო ბენდის ბოლო ტურნე მისთვის და აღიარა, რომ მოგზაურობის ბოლოს Radiohead აღარ აინტერესებდა. „მსიამოვნებდა კონცერტები, მაგრამ მძულდა ყველაფერი დანარჩენი.”
„2021 წელს ფსკერს მივაღწიე და ერთ-ერთი კარგი რამ, რაც აქედან გამოვიდა, იმის გაანალიზება იყო, თუ როგორ მიყვარდა ეს ბიჭები, რომელთაც 17 წლის ასაკში შევხვდი. ამ ყველაფერმა კი აზრი შემაცვლევინა და თუ თავიდან ვერ ვხედავდი ამ ყველაფერთან მიბრუნების აზრს, უცებ დავფიქრდი, რომ ჩვენ გვაქვს რამდენიმე ვარსკვლავური სიმღერა.”
მაშინ, როცა ბენდი სცენაზე დასაბრუნებლად ემზადება, მათ მაინც თან სდევთ წარსული სკანდალები. ინტერვიუში ბენდის წევრები გამოეხმაურნენ კრიტიკას მათი 2017 წლის თელ-ავივის კონცერტზე, იორკის კონფრონტაციაზე პროპალესტინელ ფანთან 2024 წლის სოლო შოუზე მელბურნში და ასევე ჯონი გრინვუდის კოლაბორაციაზე ისრაელელ არტისტ დუდუ ტასასთან.
იორკმა თქვა, რომ საზოგადოების ზეწოლა, რომელიც ისრაელისა და პალესტინის კონფლიქტზე მათ დამოკიდებულებას ეხება, მას ღამღამობითაც კი აღვიძებს, გრინვუდი კი აღნიშნავს, რომ ის არ ეთანხმება ისრაელელი არტისტებისთვის ბოიკოტის გამოცხადებას.
Radiohead-ის მომავალი ევროპული ტურნე ბენდის პირველი კონცერტების სერია იქნება 2018 წლის შემდეგ. ტურნე 4 ნოემბერს დაიწყება და დეკემბრამდე გაგრძელდება.
