STATION 7 ქართველი არტისტების მიერ შექმნილი პროექტია, რომელიც დროდადრო მუსიკალურ კოლექტივად ჩამოყალიბდა და სადებიუტო ალბომი, IOVELI გამოსცა. კოლექტივის წევრები არიან: გიორგი კვირკველია – პროდიუსერი, ბასი, გიტარა, კლავიში; თათია ტაბატაძე – ტექსტი, ვოკალი, კლავიში; ესო ჯღამაძე – ტექსტი, ვოკალი; ჯამბაკურ ბაქრაძე – ტექსტი, ვოკალი; სოფიკო გვიმრაძე – ტექსტი, ვოკალი; სოფო კობერიძე – კლავიში და Memotech – გიტარა.
პროექტის ინიციატორი გიორგი კვირკველიაა. IOVELI-ს ამბავი თავდაპირველად მისი სახლის სტუდიაში, არაოფიციალური ჯემ-სესიებით დაიწყო და დროთა განმავლობაში ალბომის შექმნის პროცესში გადაიზარდა. საბოლოოდ, არტისტების გაერთიანებამ მრავალდისციპლინური კოლექტივის სახე მიიღო. როგორც ალბომის აღწერაში ვკითხულობთ, STATION 7 შედგება ადამიანებისგან, „რომლებიც ერთობლივად ეძებენ ხმას, ფორმას და ემოციას.” კოლაბორაცია და ექსპერიმენტები განსაზღვრავს პროექტს, რომელიც მრავალფეროვან შემოქმედებით ხედვას აერთიანებს.
STATION 7-ის სადებიუტო ალბომში 11 კომპოზიცია შედის, რომლებიც სხვადასხვა ჟანრის ელემენტებს შეიცავს. „თითოეულ ტრეკს ავტორის უნიკალური ხელწერა აქვს, თუმცა ისინი ქმნიან ერთიან ემოციურ შინაარსს. ეს არის ინტროსპექტიული, თუმცა ამავდროულად დინამიური, აბსტრაქტული, მაგრამ ღრმად ადამიანური. ალბომი ასახავს STATION 7-ის კოლექტიური იდენტობის არსს: განვითარებადს და განზრახ არაპროგნოზირებადს,” – ვკითხულობთ ალბომის აღწერაში.
ალბომის მიქსზე და მასტერზე თორნიკე გველესიანმა იმუშავა.
ფოტოსესიაზე მუშაობდნენ: ფოტოგრაფი – გიორგი ყოლბაია, სტილი – ანნა მარტიაშვილი, არტ დირექტორი – თათია ტაბატაძე, ალბომის დიზაინი – ლუკა ზარანდია.
მოუსმინეთ ალბომს.
