ეკატერინე ბუაჩიძე მსოფლიო საოპერო კონკურსის, „ოპერალიას” გამარჯვებული გახდა. ქართველმა მეცო-სოპრანომ ყველაზე პრესტიჟული საოპერო კონკურსის პირველი პრიზი დაიმსახურა, მასვე გადაეცა ასევე სარსუელასა და მაყურებლის ჯილდოებიც.
ეს პირველი შემთხვევაა, როცა კონკურსის მთავარი პრიზის მფლობელი ქართველი მონაწილე გახდა. „ოპერალიას” სარსუელას პრიზი მანამდე მოგებული აქვთ ქეთევან ქემოკლიძესა (2008 წელი) და ანა კიკნაძეს (2002 წელი).
„მგონია, რომ სიზმარში ვარ. ‘ოპერალია’ ყველაზე დიდი საოპერო კონკურსია და ეს ჩემი ახდენილი ოცნებაა,” – ამბობს ეკატერინე ბუაჩიძე.
„ოპერალია” 1993 წელს დაარსდა და მსოფლიოს ყველაზე პრესტიჟულ საოპერო კონკურსს წარმოადგენს. მისი დამფუძნებელი ლეგენდარული საოპერო მომღერალი პლასიდო დომინგოა. ყოველწლიურად კონცერტი სხვადასხვა ქვეყანაში იმართება. მასში მონაწილეობენ ყველა სასიმღეროს ხმის მქონე მომღერლები მთელი მსოფლიოდან.
