27 ოქტომბერს გრემის მფლობელმა რეპერმა პლატფორმა X Spaces-ზე განაცხადა, რომ ალბომ Am I the Drama?-ს დელუქს ან რემიქს ვერსიის გამოშვებას არ აპირებს, რადგან მომავალ წელს სრულიად ახალი პროექტის წარდგენას გეგმავს.
„ვხედავ, რომ დელუქს ან რემიქს ალბომის გაკეთებას ითხოვთ, მაგალითად, როგორიც ჩარლი XCX-მა გააკეთა. სამწუხაროდ, მსგავსი რამ მე არ მექნება.” – თქვა Cardi B-იმ.
რეპერმა ახალი ერა დააანონსა: „მინდა, რომ ალბომი ერთ წელზე ნაკლებ დროში გამოვცე, სწორედ ამას ვგეგმავ. ახალი ერა მინდა. თითქმის უკვე ვიცი, როგორი მინდა იყოს. ის განსხვავებული იქნება Am I the Drama?-სგან,“ – თქვა მან.
ბოლო შვიდი წლის განმავლობაში Cardi B-იმ არაერთი დაპირება გადათქვა, თუმცა მისი მეორე სტუდიური ალბომი საბოლოოდ სექტემბერში გამოვიდა და Billboard 200-ის ჩარტის პირველი ადგილი დაიკავა.
მეოთხე შვილის დაბადების შემდეგ, Cardi B თებერვალში თავის პირველ სოლო ტურნეს იწყებს, სახელწოდებით: The Little Miss Drama Tour. ტურნე 11 თებერვალს კალიფორნიის ქალაქ პალმ დეზერტში დაიწყება, შემდეგ კი ლას-ვეგასში, ლოს-ანჯელესში, სიეტლში, ჰიუსტონში, დეტროიტში, ჩიკაგოში, ნიუ-იორკში, ფილადელფიაში და ვაშინგტონში გაგრძელდება და 17 აპრილს ატლანტაში დასრულდება.
ტურნეს თემაზე საუბრისას Cardi B-იმ Spaces-ზე თქვა, რომ მზად არის, მშობიარობის შემდეგ კვლავ ჩვეულ ფორმას დაუბრუნდეს:
„ხედავთ, როგორი მკაცრი გრაფიკი მქონდა ვარჯიშის დროს? მშობიარობის შემდეგაც იგივე განრიგი მექნება. მინდა, ისევ კარგ ფორმაში ვიყო, ორსულობის დროსაც ძალიან კარგად ვგრძნობდი თავს, მაგრამ ახლა მინდა, სხეული ფორმაში მოვიყვანო.”
