ბენდმა Florence + The Machine ჰელოუინი SiriusXM-ის The Spectrum-ის ლაივში აღნიშნა, სადაც ლედი გაგას Abracadabra-სა და მათი ფავორიტი Which Witch-ის მიქსი შეასრულა.
ეს გამოჩენა ერთგვარი თიზერი იყო ბენდის შემოქმედების ახალი ეტაპის – ფლორენს უელჩმა და მისმა გუნდმა მეექვსე სტუდიური ალბომი გამოსცეს, სახელწოდებით Everybody Scream. ალბომი 31 ოქტომბერს გამოდის, რის შემდეგაც ბენდი ჩრდილოამერიკულ ტურნეს გეგმავს.
ბენდის ვერსია სიმღერაზე Abracadabra – რომელიც ლედი გაგას ეკუთვნის და შედის მის ახალ ალბომში Mayhem – იდეალურად შეერწყა Which Witch-ს – თეატრალურ სიმღერას ბენდის ალბომის – How Big, How Blue, How Beautiful დელუქს ვერსიიდან. უელჩის ვოკალი მძლავრად ისმის გოთიკური პერკუსიისა და ძლიერი სიმების ფონზე, კომპოზიცია კი იმგვარად ვითარდება, როგორც ეს ფლორენსს სჩვევია: მისტიკური და პირველადი ემოციებით დამუხტული.
Everybody Scream ბენდის პირველი სრული ალბომია 2022 წლის Dance Fever-ის შემდეგ, რომელიც Billboard 200-ის მე-7 ადგილზე, ხოლო დიდი ბრიტანეთის ოფიციალური ალბომების ჩარტის პირველ ადგილზე გავიდა.
უელჩის აღწერით, ახალი ალბომი წარმოადგენს ჯადოქრობის, მისტიციზმის, მაგიის, პოეზიისა და სიგიჟის არეულ სიზმარს და ეხება სიკვდილის, ხელახლა დაბადებისა და ქალის რისხვის თემებს. ეს ყველაფერი კი შთაგონებულია გადაუდებელი ქირურგიული ჩარევით, რომელიც უელჩს ექტოპიური ორსულობის შემდეგ, გასულ წელს დასჭირდა.
„რაც უფრო ახლოს მივდიოდი ახალი სიცოცხლის გაჩენასთან, მით უფრო ახლოს მივდიოდი სიკვდილთან,” – უთხრა უელჩმა The Guardian-ს და დაამატა, რომ სწორედ მისმა შემოქმედებითი რეაბილიტაციის პროცესმა განაპირობა ახალი პროექტის ემოციური ტონი.
ალბომში შედის მანამდე გამოცემული სინგლები Sympathy Magic და Spell It Out. Everybody Scream 31 ოქტომბერს Republic Records-ის ლეიბლის ქვეშ გამოდის.
პროექტის გამოსვლის შემდეგ Florence + The Machine ჩრდილოეთ ამერიკაში გაემგზავრება, სადაც 2026 წელს ტურნეს გამართავს. ტურნე მინეაპოლისში 8 აპრილს დაიწყება და მოიცავს ნიუ-იორკს, ლოს-ანჯელესს, ჩიკაგოსა და ტორონტოს.
